Atuartut niuertunngornissaannut ikiorniaraat
Taama suliniuteqarnerup meeqqat amerlanerusut inersimasunngorunik namminersortutut suliffeqarfiuteqalernissamut pileritatsissavai.
Meeqqat inuusuttullu siunissami ilinniassavaat isumassarsiatsialak qanoq ililluni nioqqutissarineqarsinnaanersoq niuerfinnilu tuniniarneqarluni.
Namminersorlutik Oqartussat aningaasaateqarfiullu Entreprenørselskabip suleqatigiilernerisigut ineriartortitsineq atuartitsissutigineqartalissaaq.
Taama oqartoq tassaavoq Fonden for Entreprenørselsskabip pisortaanera Christian Vintergaard.
- Meeqqat namminneq isumassarsiatsialannguanik ineriartortitsineq misilittassavaat. Neriuutigineqarpoq ineriartortitsisartutut inuuneq takorloorlualersinnaassagaat, aammali atorfilittut isumassarsiatsialannik piviusunngortitsisinnaasutut.
AAMMA ATUARUK KNI niuertunngorniarnermik aallartitsisoq
Suliniummut atatillugu ilinniartitsisut Kalaallit Nunaanniittut tamarmik pikkorissarnissamut neqeroorfigineqassapput, tassani ilinniarneqarsinnaallutik sanaartugassanik suliassinneqartartutut suliaqartut ulluinnarni atuartitsinermi qanoq atorneqarsinnaanersut.
Assersuutigalugu oqaatsinik ilinniarnerni isumassarsiaq qanoq saqqummiunneqarsinnaanersoq, pinngortitamik ilisimatusarnermi isumassarsiaq qanoq tunisassiarineqarsinnaanersoq, matematikkimillu ilinniartitsinermi tunisassiap akia qanoq naatsorsorneqarsinnaanersoq.
AAMMA ATUARUK Niuertunngorniat siulliit naammassisut
Naak meeqqat atuartut suliffiutitaarsinnaanngikkaluartut meeqqat ukkatarineqarnissaat ajunngitsuusoq Christian Vintergaard isumaqarpoq.
- Takusinnaavarput Danmarkimi taamatut ilinniartitsisoqaraangat meeqqat assorsuaq nutaanik pilersitsiortortartut, tunisassiassanik aaqqiissutissanillu nutaanik eqqarsaateqarlutik, allaat uagut inersimasut takorloorsinnaanngisatsinnik. Tassani isumassarsinermiit allataqarlutillu titartaaginnartanngillat, aammali isumassarsiatik mikisunngorlugit sanasarpaat misilillugulu tuniniartarlugit, Vintergaard oqarpoq.
Suliniummut Namminersorlutik Oqartussat 1,3 millioner koruuninik aningaasaliisimapput. Taassuma saniatigut aningaasaateqarfiup Entreprenørselskabip ilinniartitsissutissat akeqanngitsumik piumasamik atorneqarsinnaasunngortippai.
AAMMA ATUARUK Aallarnisaasut suliffinnik pilersitsisinnaasut
AAMMA ATUARUK Projekt sætter unge i gang