Skaale: Kalaallit partiivisa avissaartuuteqqavallaarnerat suleqatigiinnissamut akornutaavoq
Kalaallit savalimmiormiullu sisamanngorpat qinersinerup kingorna Folketingimi kingumut suleqatigeeqqilersinnaanerat ungasilliartuinnartutut ippoq.
Siumup Demokraatillu atlantikup avannaamiut ilaasortaatitaasa pisortatigoortumik - Atlantikup avannaamiut suleqatigiit siornatigut suleqatigiinnerisa assinganik - suleqatigeeqqilernissaat kissaatigaat, Savalimmiunili socialdemokraatit - Javnadarflokkurin - taamatut suleqatigiinnissaq soqutiginngilaat.
- Ataatsimut sulisoqarluta, aningaasaqarnerput ataatsimoortillugu politikkikkullu ataatsimoorussamik siunnerfeqarluta suleqatigiinnik pilersitsinissaq kissaatiginngilara. Tamanna iluatsinneqarsinnaanngilaq, partiip folketingimut maanna ilaasortaatitarisaa, Sjurdur Skaale, qinigassanngorteqqittoq, KNR-imut taama oqarpoq.
AAMMA ATUARUK Kalaallit savalimmiormiullu Folketingimi ilaasortanngortussat qinersereernermi suleqatigeeqqittariaqarput
Avissaartuuttoqarpallaaqaaq
Skaale isumaqarpoq atlantikup avannaamiut ilaasortaatitaasa sisamaasut aalajangersimasumik suleqatigiilernissaannut kalaallit partiivisa isumaat assigiinngippallaartut. Tamannalu uranimik qalluinissamut naaggaarluinnarnermut tunngatillugu suliami ilaatigut ersersinneqarsimanasoraa.
- Kalaallit partiivinit marlunnit qinigaajumaartussat sunaluunniit isumaqatigiissutiginngilaat. Partiit taakku marluk akunnerminni taama isumaqatigiinngitsitigitillugit IA Siumulluunniit tapersersussanerlugit siumoorlunga oqaatigisinnaanngilara. Taamaammat suliamit suliamut suleqatigiinneq ingerlasariaqarpoq, Sjurdur Skaale taama oqarpoq.
Aamma suliat Savalimmiunut aammalu Kalaallit Nunaannut attuumassuteqartut ilaatigut ima assigiinngitsigisarput ataatsimut oqaaseqartarnissaq takorlooruminaalluni. Suliani taama ittuni kisimiinnissaq partiillu sorliugaluarpalluunniit suleqatigisinnaanissaa iluaqutissartaqarnerussaaq.
- Ilaasortat sisamaannaallutik suleqatigiilissappata soriarsinnaaneq annikillerujussuassaaq. Qulliunerusunut, ministerinut allanullu attaveqarsinnaanissara uannut pingaaruteqartupilussuuvoq, Sjurdur Skaale taama oqarpoq.
Inatsisit tunngaviusut ataatsimoorluni sulissutiginissaat
Savalimmiormiulli socialdemokraatertaat isumaqarput atlantikup avannaamiut ilaasortaatitaasa sisamaasut suleqatigiissutigisinnaasariaqagaannik suliassaqartoq. Assersuutigalugu namminerisamik tunngaviusumik inatsiseqalernissaq, Savalimmiuni maannakkut oqallisaasupilussuusoq.
- Savalimmiut Danmarkillu akornanni tamanna pillugu (inatsit tunngaviusoq, aaqq.) oqallisigineqalissagaluarpat, naatsorsuutigaara atlantikup avannaamiut ilaasortaatitaasa sisamaasut taamatut piumasaqarneq ataatsimoorfigiumaaraat, Atlantikup avannaamiuusugut isumaqatigiissutigisinnaassagutsigu, Sjurdur Skaale taama oqarpoq.
Savalimmiuni talerperlerneersut folketingimut ilaasortaatitaasa Edmund Joensenip Sambandspartiimeersup 'suleqatigiinnissaq ammaffigaa', taassumali aalajangersimasumik suleqatigiinnissaq aamma orniginartinngilaa.
Partiip Republikanerit siulittaasuata Høgni Hoydalip oqaatigaa Inuit Ataqatigiit kisiisa Folketingimi suleqatiginissaannik siumoorlutik maannamut isumaqatigiissuteqarfigereersimallugit. Partiillu Inuit Ataqatigiit assingalugit qinersinissaq sioqqullugu ministeriunertut kina toqqarusunnerlugu nalunaarutigereerusunngilaa.
