Sjúrður Skaalep Mette Frederiksen tapersersoraa - piumasaqaatitalimmilli

Sjúrður Skaale Folketingimut Savalimmiuni partii Javnaðarflokkurin sinnerlugu qinigaaqqippoq.

Socialdemokratit siulittaasuata, Mette Frederiksenip, amerlanerussusiisinnaanissaanut taamaalilluni tuniliaqutseeqataavoq. Mette Frederiksen naalakkersuisoqatigiiliorsinnaanissamut tunngatillugu kunngip naalakkersuisussarsioqqusaasutut amerlanerussuteqartunit tikkuarneqarpoq.

Piumasaqaatitalimmilli tapersersorniarpaa:

- Pisoq inissisimaffilluunniit atornerlunnianngilarput. Inissisimaffippulli naammassisaqarfiusunut sapinngisamik amerlasuunut atorniarparput, Sjúrður Skaale nittartakkakkut nutaarsiassaqartitsivimmut Altinget Arktisimut oqarpoq.

Javnaðarflokkurin Socialdemokratinik suleqateqarpoq. Partiit taakku marluk tapersersoqatigiinnissaat taamaammat pissusissamisoorpoq.

AAMMA ATUARUK Savalimmiuni talerperliit saamerliillu ilaasortaatitaqalersut

Sjúrður Skaalelli partiimik allamik tapersersuisinnaanissani mattutinngilaa, Socialdemokratimmi Javnaðarflokkurinip piumasaqaataanut tunuliaqutsiisinnaanngippata assersuutigalugu partii Moderaterne, Lars Løkke Rasmussenimit siulersorneqartoq, tapersersoratarsinnaavai.

- Paaseqatigiilluta isumaqatigiissusiorsinnaagutta, taava partiit saamerliit siammasissumilluunniit naalakkersuisoqatigiit tapersersorsinnaavagut, Sjúrður Skaale oqarpoq.

Lars Løkke Rasmussenilu siornatigut suleqatigiilluartarsimallutik, taassuma oqaatigaa.

Nammineq partiimilu Mette Frederiksenimut suut piumasaqaatiginiarnerai, Sjúrður Skaalep oqaatiginianngilaa. Matoqqasumik isumaqatigiinniarnissanut taakku nammineq saqqummiukkumavai.