Arfeq qaqutigoortoq plastikkinik nerisaqarsimallunilu puaani parasitsiseqartoq
Anarnaq ullumi ataasinngornermi pilanneqarpoq aqajaruanilu plastikkinik nassaartoqartoq, Charlotte Thøstesen taama paasissutissiivoq.
Esbjergimi anarnap ataasinngornermi misissorneqarfiani, aalisarneq imarsiornerlu pillugit katersugaasivimmi, uumassusilserisoq, Charlotte Thøstesen taama paasissutissiivoq.
- Aqajaruani nassaarineqarpoq plastikki amitsoq 20-25 centemeterisut takitigisoq, aamma nassaarineqarpoq plastikki arrujaatsoq taanna fire centemeterisut silitsigivoq syv centemeteritullu taktigaluni, Charlotte taama nassuiaavoq.
Plastikki aqajaruani nassaarineqartoq arferup toquneranut sunniuteqarsimanersoq suli ilisimaneqanngilaq.
Arferup tartuani parasittinik aamma nassaartoqarpoq. Tamanna arferup ingerlaarnermini allamut sanguneranut toquneranullu aamma sunniuteqarsimasinnaavoq.
Anarnaq angutiviaq seks meterisut takitigivoq to tonsitullu oqimaatsigaluni.
Arfeq danskit imartaanni qaqutigoortorujussuuvoq.
- Amikutortartuuvoq imavissuarni itisuupilussuarni pisarisarlugit , Charlotte taama naassuiaavoq.
Katersugaaviup inspektøriata oqarnera naapertorlugu anarnaq arferit akornanni immap naqqaniissinnaanerpaat ilagaat.
Tamanna ilisimatuut arferup ilormiuinik misissuilluarniarnerannut aamma tunngaviuvoq. Assersuutigalugu anarnap uummataa qarasaalu misissorneqassapput.
Anarnap uummataa Arhus Universitetshospitalimi skannerneqassaaq.
Anarnaq neqitaarulluni saanikuinnanngorpat, pilersaarutaavoq saarngi katersugaasivimmut, Statens Naturhistorisk Museumimut Københavnimiittumukaanneqassasut. Katersugaasiviulli inspektøriata saanikuisa nassaarineqarfiata eqqaani takusassiarineqarnissaat takorluugaraa.
- Statens Naturhistoriske Museumimi katersanut ilaalisaaq, Esbjergimili siunissami aamma takusassiarineqarnissaa nuannissagaluarpoq, Charlotte Thøstesen oqarpoq.
Anarnap toquneranut pissutaasoq pillugu nalunaarusiaq qaammatit arlaqartut qaangiuppata naammassineqarnissaa biologip Charlotte Thøstesenip naasorsuutigaa.
