Atuarfik Inussuup pisortaa: Siunniussap anguniaannarnissaa pingaaruteqarpoq
Uffe Lilholm Nuummi atuarfimmi nutaarsuarmi Atuarfik Inussummi pisortanngortussanngorami Silkeborgimi Dybkær Specialskolemi atuarfimmi pisortaajunnaarpoq, suliassanilu imaannaanngitsoq nalunngilaa.
Aallartisarnerulli taamarsuaq ilungersunartiginissaa takorloorsimassagunanngilaa:
- Aallartinniarnerup ajornakusoornera qularutissaanngilaq. Atuarfiit marluusut ataatsimoortinneqarput, taamaattumik atuarfimmik nutaaliornermi ajornartorsiutaasartut aqqusaarpagut, taanna oqarpoq nangillunilu:
- Qarasaasiatigut atortut atulerniarnerat, oqarasuaatit normui nutaat aamma skemaliornermut atortakkat atorsinnaanngimmata nammineq allattuivugut. Aallartinniarnitta ilungersunarluinnarnera qularutissaanngilaq, taanna oqarpoq.
Qarasaasiatigulli attaviit ajornartorsiutaanerat atuarfimmut nutaamut isertereersimagaluaraanniluunniit ajornakusoorsimassasoq, taassuma oqaatigaa.
Nalornisoqartoq
Atuartitsinermittaaq atorneqartartut poortoqqasut atuarfimmi nutaami piareersimasimagaluarput.
Maannali qaammatit marluk qaangiutilerneranni atuartitsissutit atuarfitoqqani Atuarfik Samuel Kleinschmidtimi aamma Atuarfik Ukaliusami puuiaqqinneqartariaqalerput.
Tamannalu atuarfimmi tamanut sunniuteqartoq, atuarfiup pisortaa oqaluttuarpoq:
- Atuarfimmut nutaamut suli isertinnginnerput meeqqat inersimasullu pakatsissutigaat, taanna oqarpoq.
Tamarmimmi qilanaartut taanna oqarpoq.
Atuartut, ilinniartitsisut sulisullu ininut nutaanut qaqugu isertersinnaalernisaat qaqugulu pilersaarutinik piviusunngortitsisinnaalernissaat maanna nalornissutaanerpaagallarpoq:
- Ukiaanerani atuanngiffeqareernermi, decembarimi imaluunniit februaarimi nuunnissarput nalunngereertuugutsigu qanoq iliornissarput ajornannginnerussagaluarpoq, taanna oqarpoq nangillunilu:
- Qaquguli nuunnissaq ilisimaneqanngimmat qanoq sulitiginissarput nalorninarpoq. Taanna nalornineq akineqarsinnaanngitsoq aporfiungaatsiarpoq, Uffe Lilholm oqarpoq.
Anguniagaq pingaarutilik
Naak atuartitsiviulersussanut suli isertertoqanngikkaluartoq atuarfimmi nutaami siunniussat suli anguniarneqarnissaat atuarfiup pisortaata nutaap pingaartikkaa malunnarpoq.
- Atuarfiit marluk akornanni ataatsimoortumik anguniagaqarnerput tunniutiinnarata attapparput. Atuarfittaamilu ingerlanissatsitut maanna sulivugut.
Ukiaanerani atuanngiffeqareernermi atuartitsiffissanut nutaanut iserternissaq borgmesterip, kommunaldirektørip atuarfiullu neriuutigigaluarpaat, taammaattoqalinngikkaluartorli ilinniartitseriuseq nutaaq atorneqalissasoq, Uffe Lilholm oqarpoq:
- Atuarfimmi nutaami perorsaariaatsimut pingaaruteqartussaq sapaatip-akunnerata tulliani immikkut sammisaqarnissami eqqartorneqassaaq, pisummi taamaatsillugit qanoq angusaqarluarsinnaanerput pingaaruteqartoq isumaqarpunga. Utaqqiinnarata siunniussatsinnik anguniagaqassaagut, taanna oqarpoq.
Naak atuarfitoqqani suli atuartitsisoqaraluartoq anguniakkat nutaat piviusunngortinneqarsinnaasut taanna isumaqarpoq.
Nalorninerullu aporfiuallaannginnissaa taassuma aamma atuarfimmi ilinniartitsisut angorusukkaat malunnarpoq. Taamaattumik ilinniartitseriaatsip nutaap ukiaanerani atuanngiffeqareernermi misilittarneqalernissaa atuarfiup pisortaata qilanaaraa.
- Atuarfimmi nutaami perorsaariaaserisassarput atorlugu ingerlaqqissaagut, Uffe Lilholm oqaluttuarpoq.
Tamanna taassuma pingaartinnerpaanerarlugu taama oqarpoq.
