Atuarfiup pisortaa: 1. klassinngortussanut atatillugu pingaartumik uggornarpoq

Nuummi atuarfik nutaaq, Atuarfik Inussuk ukiup atuarfiup aallartinnissaanut piareernavianngilaq. Tamanna atuarfiup pisortaata uggoraa, atuartulli pilersaarut naapertorlugu aggustip 15-ianni aallartissapput.

Allattoq Nicole Sander Bertelsen

aggustip 13-at 2024 07:50

Nutserisoq Connie Fontain

- Meeqqanut ilaqutariinnullu – pingaartumik 1. klassimi atualertussanut – atualeqqaarfissamik allanngueqqittariaqarlutalu atuarfimmut nuussinnaannginnatta ajuusaarnartorujussuuvoq, Uffe Lilholm ukiup atuarfiusussap nutaap aallartinnginnerani oqarpoq.

Ukiup atuarfiusussap atuarfiup nutaap piariinnginnera pissutigalugu aallaqqaammut aggustip 29-anut kinguartinneqarpoq. Ukiorli atuarfiusoq pilersaarut naapertorlugu aggustip 15-ianni sisamanngornermi aallartiinnassasoq Kommuneqarfik Sermersuup tusagassiuutinut tallimanngormat nalunaarutigaa. Atuarfissarli suli piariinngilaq.

- Atualeqqaartoortussanut peqataajartorlutik nunatsinnit tamarmit timmisartukkut angalanissaminnut billetsisimasunut tamanna pingaartumik uggornarpoq. Atuarfittulli tamanna iliuuseqarfigisinnaavallaanngilarput, taamaallaat ilaqutariinnut tamatuma ajoqutaasimanissaa ajuusaarutigisinnaallugu, atualeqqaarfissamillu pitsaanerpaatitsiniarsaraluta, Uffe Lilholm oqarpoq.

Aamma atuarukNuummi atuarfik nutaaq kingusinnerusukkut ammassasoq

Taamaammat atuarfitoqqat marluk Atuarfik Samuel Kleinschmidt aamma Atuarfik Ukaliusaq atuartut ilinniartitsisullu Nuup qeqqani atuarfimmut nutaamut nuussinnaalernissaasa tungaannut atorneqaqqittussanngoramik puuiaaqqilerput.

1. klassinngortussanit 3. klassit ilanngullugit kiisalu 8. klassimit 10. klassimut atuartut ukioq atuarfiusoq USK-imi aallartissavaat, 4. klassiniit 7. klassimut atuartut kiisalu specialklassit ASK-imi aallartissapput.

Atuanngiffeqarnissamut pilersaarutit allanngunngitsut

Ukiup atuarfiusup sisamanngorpat aallartittussaanera pissutigalugu ullut atuanngiffiusussat qulit atualeqqaartoqarnissaanut aggustip 29-anut inissinneqarsimagaluartut pisariaqarunnaarput.

- Atuarnerup aallartilernera pissutigalugu Nuummi atuarfiit sinneri assigalugit atuanngiffeqarnissamut pilersaarutit taamaaginnassapput. Taamaammat aasaanerani atuanngiffeqartoqalinnginnerani pilersaarutaasumut uteqqippugut, Uffe Lilholm oqarpoq.

ATUARFIK INUSSUMMI ATUARTUT ATUALEQQAARNISSAATA INGERLARNGA

Aasaanerani atuanngiffeqarneq aallartimmat ukioq atuarfiusoq nutaaq aggustip 15-ianni aallartittussatut pilersaarutigineqarpoq.

Atuartulli Atuarfik Inussummi atualeqqaarnissaat ullunik 14-inik kinguartinneqartoq Kommuneqarfik Sermersuup juulip 25-anni nalunaarutigaa, taamaalilluni ulloq atualeqqaarfissaq aggustip 29-annut kingunartinneqarluni.

Aallaqqaammulli pilersaarutaasoq aggustip 15-ianni atualertoqarnissaa atuinnassasoq kommunip aggustip qulingiluaani nalunaarutigaa, taamaammat atuartut aggustip 15-iani atualissapput.

Nuummi atuarfiup nutaap atualertoqarnissaanut suli naammassinnginnera pissutaavoq, qaqugulu naammassissanersoq suli ilisimaneqarani.

Taamaammat atuarfitoqqat ASK aamma USK Atuarfik Inussummi atuartitsiviit nutaat atulersinnaanissaata tungaanut atulerneqaqqipput.

Atuartut ilinniartitsisullu Atuarfik Inussummut qaqugu nuussanersut Uffe Lilholmip ilisimanngilaa. Taassumali atuartut ukiumi atuarfiusumi aallartilluarnerpaanissaat pillugu sapinngisaminnik suliaqarlutik oqaatigaa.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.