Nannut inatsisartuni maanna oqallisaalerput. Nannuttassiissutit amerlineqarnissaat maanna kissaatigineqarpoq
Silap pisssusiata allanngoriartornera avatangiisitsinnut assigiinngitsutigut sunniuteqarpoq.
Aasat sivitsoriartorput, immallu sikuusarnerat sivikilliartorluni. Nannunut tamanna assigiinngitsutigut kinguneqarpoq, taakkumi nunamiinnerulerput, allatut nerisassassarsiortariaqalerlutik, sumiiffinnilu nalinginnaanngitsuni aamma taamaaliortariaqalerlutik.
Issittumi inuit nannullu imminnut tamanna pillugu qaninneruleriartuinnarput. Taamaanneralu kingunipiloqarsinnaavoq.
- Nanoq ulorianartuuvoq, qanillattornerallu toqqissisimananngilaq, Fernando Ugarte, uumasulerisutut ilinniagartooq, Pinngortitaleriffimmeersorlu, oqarpoq.
Sillimaniartoqartariaqartorlu taanna erseqqissaavoq.
Nannut inoqarfinnut qanillattortalernerisa iliuuseqarfigineqarnissaa politikerit piffissami sivitsortumi kissaatigaat. Nannut tamanna pillugu inatsisartut ukioq manna ukiakkut ataatsimiinnneranni oqallisigineqartussaapput.
Pisut ulorianartut
Nannut arlallit inoqarfinnut upernaaq aasaq mannalu qanillattornerat pissutaalluni toqunneqartariaqarsimapput.
Nannut ulorianartorsiortitsisarnerat pinngitsoortinniarlugu kujataani nannuttassiissutit sisamanit ikinnnerpaamik qulinut qaffanneqartariaqartut Anders Olsenip, Siumumeersup, siunnersuuutigaa.
- Taakkua nannutttassat sisamat uanga isumaqarama ikippallaarujussuartut, aammalu taama assinganik taqqavani piniartut, innuttaasut allallu aamma isumasiortarneranni, taakua pisassat sisamaanaasut ikipallaarujussuarmata, Anders Olsen oqarpoq.
Nannut savaateqarfinnut inoqarfinnullu allanut tikiuttut qimaatinniarsareqqaarnagit takunneqqaartumit pisarineqarsinnaalernissaat, Mariane Paviasenip, Inuit Ataqatigiinneersup, taassuma saniatigut siunnersuutigaa.
- Illoqarfimmi inunnut ulorianartorsiortitsisarami, tassa toquttariaanaasutut uanga isigaara, taanna oqarpoq.
Ilisimalikkat nutaat
Nannuttassiissutit qaffanneqassannersut pillugu aalajangiisoqartinnagu biologit misissuineranni inernerit utaqqimaarneqarput.
Aalisarnermut piniarnermullu naalakkersuisoq Kim Kielsen(Siumut), inatsisissatut siunnersuutinut, ataasinngornermi oktobarip ulluisa 21-anni siullermeerneqartussatut pilersaarutigineqartunut akissuteqaammi allappoq Tunumi Tunullu Kujataani 2014-imit maannamut nannut pillugit annertuumik misissuisoqartoq misissuinerniillu nalunaarusiaq utaqqimaarneqartoq:
- Nalunaarusiat saqqummertussat takoqqaarsimatinnagit nalilersimatinnagillu nannuttassat sisamaniit qulinut amerlineqarnissaat Naalakkersuisut
oqariartuutigisinnaanngilaat. Kim Kielsen akissuteqaammi allappoq.
Fernando Ugarte, Pinngortitalerifffimmeersoq, ilisimatuussutsikkut misissuinernut peqataavoq.
Tunumi nanoqassuseq pillugu nalunaarusiamut allagaqaatit siulliit Fernando Ugartep mailianut anngutereerput. Nalunaarusiap qaammatip tulliata ingerlanerani naammassineqarsinnaanissaa, nutaanillu aappaagu ukiup aallartisimalaarnerani inassuteqaasiortoqarsinnaanissaa taassuma neriuutigaa.
Kujataani nannut immikkuullarissut
Kujataani nannunut inassuteqaasiornissamut tunngavissat allaanerussuteqarput.
Tamaanimi nannut immikkuullarissutigvaat Tunumit sikorsuakkoorlutik kujataanut annguttarmata.
- Nannut kujataanut annguttartut Tunumut uteqqissinnaanissaat ilimanarpallaanngilaq. Taamaammat nannut kujataanut annguttartut pillugit pissutsit allaanerulaarput, taanna oqarpoq.
Kujataani misissuisoqaleruttorpoq, nalunaarusiarlu aappaagu ukiup ingerlanerani saqqummiunneqarumaarluni.
- Kujataanilu nannut pillugit taamaammat suli oqaaseqarsinnaanngikkallarpunga, Fernando Ugarte oqarpoq.
Pisassiissutit nutaat kingunissaat
Kujataani nannuttassiissutit qaffanneqarpata tamatuma qanoq kinguneqarsinnaanissaa Fernando Ugartep taamaattoq nassuiakannerpaa:
- Tunumi nanoqassutsimut sunniuteqangaarnavianngilaq, kujataanili kitaanilu nanoqassutsimut sunniuteqassaaq, taanna oqarpoq.
- Nannut kujataaniittut akornanni amerlasuut kitaata sineriaa atuarlugu avannarpartertarput, Davis Strædemi Bafffinillu kangerliumarngani nannunut allanut anngussinnaallutik. Nannunut taakkununnga aamma sunniuteqassaaq, nannut pillugit misissuisoq oqarpoq.
Nannut Kommune Kujallermi inoqarfinnut qanillattortut qimaatinniarsareqqaarnagit toqunneqarsinnaanissaat inatsisissatut siunnersuutigineqarpoq. Tamanna piviusunngussappat arlaatigut kinguneqarsinnaava?
- Siunnersuut ilisimasaqarfiginngilara, apeqqullu uumasulerinermut tunngasuunngilaq. Aqutsinermut tunngasuuvoq. Taamaammat isuma pitsaasuunersoq pitsaasuunngiinnersorluunniit oqaatigisinnaanngilara, Fernando Ugarte oqarpoqq, nangillunilu:
- Nanoq aallaaneqartinnagu qimaatinniarneqartariaqartoq uanga isumaqarpunga, taanna oqarpoq.
Nannut pillugit inatsisissatut siunnersuutit pilersaarutit naapertorlugit sisamanngornermi oktobarip ulluisa 17-ianni siullermeerneqartussaagaluarput.
Ataasinngornermulli oktobarip ulluisa 21-ata tungaanut kinguartinneqarpoq, ineqarnermummi attaveqaasersuutinullu naalakkersuisumut Hans Peter Poulsenimut(Siumut) tatiginninnginnermik taasisitsisoqarnissaa siunnersuutigineqarami.
