Pisortat ingerlataat: Siunissami qanoq annertutiginissaa partiit isumaqatigiinngissutigaat

Nunatsinni innuttaasut pingasuugaangat ataaseq pisortani sulisuusarpoq, Namminersorlutillu Oqartussani sulisut ukiut pingasut ingerlanerini 223-nik amerleriarsimapput. Partiit arlallit pisortat ingerlataannik annikillisaaniarput qanorli ilusilerlugu tamanna pissanersoq isumaqatigiinngissutigalugu.
Assi © : Namminersorlutik Oqartussat
apriilip 24-at 2018 09:43
Nutserisoq Simon Uldum

Pisortat ingerlataannik annikillisaasoqassaaq, partiit arlallit taama isumaqarput, ilaatigut Demokraatit, Partii Naleraq Suleqatigiissitsisullu.

Namminersorlutik Oqartussani sulisut ullumikkut 4.500-t missaanniipput, 2016-imullu naleqqiullugu 223-nik amerleriaateqarsimallutik, 2018-imut aningaasanut inatsimmi tamanna atuarneqarsinnaavoq.

Kommunini 2015-imi pisortani atorfillit amerlassusaat
Kommune Kujalleq:  1.288 / 45,5 %
Kommuneqarfik Sermersooq: 4.496 / 41,7 %
(Siorn.) Qeqqtta Kommunia: 1.630 / 35,8 %
(Siorn.) Qaasuitsup Kommunia:   2.888 / 39,2 %

Namminersorlutik Oqartussat atorfillit

2018 (2017-imi naatsorsuutigineqartoq): Sulisut 4.518-it
2017: Sulisut 4.398-t
2016: Sulisut 4.295-it

Najoqqutarisat: 2018-imut aningaasanut inatsit aamma Nuna tamakkerlugu pilersaarummut nassuiaat 2017

Demokraatit naapertorlugit tamanna namminersorlutik oqartussat ingerlatseqatigiiffiisa namminersortunngorarneqarnerisigut, misissuinerit nassuiaatillu akisoorsuit politikerinit suliakkiissutigineqartartut sipaarniarfiginerisigut kisitsisit ilaatigut appartinneqassapput. 

Tamatuma saniatigut naalakkersuisoqarfinni aningaasartuutit killilersimaarneqassapput, soorlu assersuutigalugu atorfeqarunnaartoqarneratigut.

- Aamma eqqarsaatigeqqissaartariaqarparput soraarninngortoqaraangat suliassat sulisut akornanni agguataartassanerisigut atorfinnik nutaanik pilersitsinissaq pinngitsoortinniarlugu, Randi Vestergaard Evaldsen KNR-imut taama oqarpoq.

Naleraq: Siulersuisut pisortallu sipaarfigineqassapput

Partii Naleqqap sipaarniuteqarniarnera ilaatigut namminersorlutik oqartussat ingerlatseqatigiiffiisa ataatsimut katersornerisigut pissaaq, allaffissornermut, siulersuisunut ajunngitsorsiassanut akissarsianullu aningaasartuutit ikisarniarlugit.

Tamannalu RAL-imut, Sikukimut, Mittarfeqarfinnut Kalaallit Airportsimullu atuuppoq, taakku attaveqaqatigiinnermut ingerlatseqatigiiffimmut ataatsimut katersorlugit. Tamanna aamma inissiaatileqatigiiffinnut Iserimmut, INI-mut Illuummut atuutissaaq, partii taama isumaqarpoq.

AAMMA ATUARUK Nunaqavissuinnaat siulersuisuniissapput

Partiip namminersorlutik oqartussat suliassaaqarfii amerlanerusut kommuninut nuunneqarnissaat aamma kissaatigaa. Tamanna kommunini atorfillit amerlinerannik kinguneqassaq qitiusumillu allaffissornermut oqilisaataalluni - pingaartumik Namminersorlutik Oqartussani allagaatit kalaallisut danskisullu suliarineqartarnissaannik piumasaqaat peerneqarpat.

- Oqaatsigut aallaaviginerusariaqalerpagut. Taamaaliornikkut nutserinerujussuaq aamma unitsinneqassaaq aningaasarpassuillu sipaarutaallutik, Hans Enoksen taama oqarpoq.

Demokraatilli Inuit Ataqatigiillu Namminersorlutik Oqartussani sullissinerup kalaallisut danskisullu ingerlatiinnarneqarnissaa kissaatigivaat.

IA pisariillisaaniarpoq - ikilisaananili

Tillie Martinussenip Suleqatigiissitsisuneersup pisortat ingerlatseqatigiiffiisa suliassaqarfinni arlalinni ataatsimoortumik pisiniartarnissaat aamma kommunit namminersorlutillu oqartussat akimorlugit ataatsimoorussamik IT-systemiliornikkut suliassanik pisariillisaanissaq siunnersuutigaa.

Inuit Ataqatigiit pisortat ingerlatseqatigiiffiinik annikillisaanianngillat. Partiilli siulittaasuata Sara Olsvigip pisortat ingerlataanni sorlerni sulisunik ikilisaasoqarsinnaanersoq toqqaannartumik akissuteqarfigerusunngilaa.

AAMMA ATUARUK Olsvig vil gøre op med silotænkningen i Selvstyret

Pisariillisaasoqarnissaali siunnersuutigaa, taamaaliornikkut Danmarkimit suliassaqarfinnik tigusinissamut isumaginnittussaqarniassammat.

- Kommunini Namminersorlutillu Oqartussaani nukittorsaasariaqarpugut, pisariillisaalluta eqaallisaallutalu,  taamaaliornikkut suliassaqarfinnik tigusinissamut piareersimaqqulluta.

Pisortat ingerlataat siunissami qanoq aaqqissuunneqassanersut pillugit KNR-ip apeqqutaanut Siumut akissuteqarsimanngilaq.