Siumut sissuernerusariaqartoq. Qinigassanngortittut allattorsimaffii atorsinnaatinneqartut

Allattorsimaffik kukkusumut nassiunneqaraluartoq, Siumut sinnerlugu qinigassanngortittut allattorsimaffiat atuuttussaatinneqarpoq. Qinersinermut ataatsimiititaliaq taama aalajangerpoq.

Kommunemut qinersinissamut apriilip ulluisa arfernganni pisussami partiit qinigassanngortitami nalunaarutiginissaanut piffissaq kingulleq tassaavoq marlunngornermi 23 februar ullup qeqqanut.

LÆS OGSÅ Flere valgdage i tilfælde af coronaudbrud

Qinersinermut inatsit naapertorlugu, qinigassanngortittut allattorsimaffii qinigassanngortiffini ataasiakkaani qinersinermik siulersuisunut nalunaarutigineqassapput.  Kisianni Siumut sinnerlugu Kommune Kujallermi aamma Kommune Qeqertalimmi qinigassanngortittut allattorsimaffii, Kommuneqarfik Sermersuumut nassiunneqarsimapput.

Taamaattumik Qinersinermut Ataatsimiititaliap ilaasortai pingasunngornerni ualikkut ataatsimiipput,  qinigassanngortittut allattorsimaffii akuerineqassanersut itigartinneqassanersulluunniit.  Akuerineqarpulli. 

Qinersinermut ataatsimiititaliap aalajangerpaa, pisoq ajusaarnartorujussuusoq. Qinersinermut ataatsimiititaliap peqatigitillugu aalajangerpaa, kukkuneq ima ajortiginngitsoq, immineerluni Siumup partiip qinigassanngortittunut allattorsimaffianik tunniussanik tigusinnginnissamut tunngaviliissasoq, Qinersinermut Ataatsimiititaliaq taama allappoq erseqqissaatigaalu qinersinermut ataatsimiititaliap tamanna tunuliaqutaralugu aalajangermagu  tunniussineq atuuttussatut isigineqartariaqartoq.

Sissuerlusi

Tusagassiuutinut nalunaarummi ataatsimiititaliap innersuussutigivaa siusinnerusukkut assingusunik pisoqarnikuummat, tassalu partiit kingusinaarlutik imaluunnit kukkusunut nassiussisimasut immikkut akuerineqartarsimammata.   

Qinersinermut Ataatsimiititaliaq partiinut erseqqissaassuteqarpoq sissueqqusilluni:

 -Qinersinermut ataatsimiititaliap sakkortuumik innersuussutigaa, partiit tamarmik annertunerusumik sissuernerusariaqartut, nalunaarfissatut piffissaliussat soorlu qinersinissamut qinigassanngortittut nalunaarutigineqarnerat pineqaraangat.- Qulakkeerneqartariaqarpoq, nalunaarutiginninnermut allattuiffiit immersorneqarneri eqqortuunissaat aamma piffissaq qinersinernut ataasiakkaanut atuuttoq killiliussaq sioqqullugu tunniunneqartarnissaat.

 Kommunemut qinigassanngortittut katillutik 253-upput