Siumut: Konservativit siunnersuutaat nunatsinnut akornusersuutaavoq
Siumut Nuummi kulturimut illorsuarmi Katuami oqallinnermi pingasunngornermi ualikkut peqataatitaqartussaagaluarpoq
Oqallinnissaq Konservativinit, siunnersuummik "Naalagaaffeqatigiinneq qaninnerusoq"-mik saqqummiusseqqammersumit, aaqqissuussaavoq.
Siumulli siulittaasuata Erik Jensenip siunnersuut ima quarsaarutigitigaa, partiia allaat oqallinnissami peqataaniarunnaarluni.
Oqallissaarut quppernialunnik takissusilik ima pineqartumut uniuitigaaq, imaa tutsuiginassuseqanngitsutut nalilerlugu Siumut peqataasinnaanngitsutut inississimalluni, taamaattumillu aalajangersimalluni Det Konservative Folkepartip oqaloqatigiinnissamut qaaqqusissutaanut peqataaniarani, Siumup siulittaasua, Erik Jensen Siumup nittartagaani allappoq.
Siunnersuut qangamut atallunilu naalagaaniarnerusoq
De konservative Folkepartiip Kalaallit Nunaat Savalimmiullu naatsumik oqaatigalugu Danmarkimi naalakkersuinermut akuunerulersikkusuppai. Ilaatigut nunat taakkua Folketingimi nunanut allanut tunngasuni aalajangiisartunut ilaasortaqalersinnerisigut Danmarkillu naalaagaaffeqatigiinnut ministereqarfeqalernerisigut taamaaliortoqarsinnaavoq.
Taava aamma siunnersuut naapertorlugu innuttaasut suliffissat, ilinniarnissamut periarfissat naalagaaffiullu ilani allani najugaqarnissamut tunngasunit siunnersorneqarfigisinnaasaannik qallunaallu oqaasiannik ilinniarfigisinnaasaannik nunatsinni Savalimmiunilu allaffeqalissaaq.
Siunnersuutilli taamaattut qangamut atasuusut nunattalu namminiilivikkiartornerannut akerliusut, Siumut isumaqarpoq.
Siumup ingerlavissatut kissaatiginngilaa, Inuiaat Kalaallit aammaartumik Danmarkimut pituttorneqassasut, taamalu Danmarkip illorsuata tunuata tungaani inuuneqassasugut danskillu politikiannut sanilliulluta appasinnerusumik inissisimassasugut. Tamanna pinavianngilaq, Erik Jensen allappoq.
AAMMA ATUARUK Konservative: Kalaallit savalimmiormiullu politikkikkut sulinermi akuunerulissapput
De Konservativet naalagaaffeqatigiinni inuusuttut akornanni paarlagiittoqarnerunissaa aamma siunnersuutigaa.
Aamma qallunaat inuusuttut atuarnerminnut atatillugu nunatsinnut Savalimmiunullu angalasassasut, taavalu kalaallit assersuutigalugu Danmarkimi ilinnialertigatik qallunaatut oqallorissarlutik qallunaani ilaqutariinni najugaqalertassasut, konservativit siunnersuutigaat.
Taamali siunnersuuteqarnikkut qallunaat kulturiat kalaallit inuusuttaannut pigiliutsinniarneqartoq, Siumut isumaqarpoq.
Det Konservative Folkepartiip siunnersuutigaa
Naalagaaffeqatigiit pillugit immikkut ministereqarfeqalernissaa, taanna ukiumut 20 mio. koruuneqassaaq.
Naalagaaffeqatigiinni innuttaasunut sullissivinni allaffiit illoqarfinni arfineq-marlunni taakku ukiumut 70 mio. koruuneqassapput.
Kalaallit savalimmiormiullu Danmarkimi allaffeqarnissaannut ukiumut 20 mio. koruunit.
Inatsisartoqarfiit pingasut ukiumut katersuuttarnissaat ukiumut 1 mio. koruunit.
Efterskolemut, oqaatsinik kulturimillu ilinniarfinnut ukiumut 22 mio. koruunit.
Kalaallit Nunaanni sakkutuujusussaatitaanermut misilitsinneq: Taakku Illersornissaqarfiup missingersuutaasa iluanniipput.
Paasissutissarsiffik: "Et tættere Rigsfællesskab"
- Partii (De Konservative, aaqq.) isumaqavissimavoq, Danmarki Kalaallit Nunaannut qitiulluni inissisimassasoq... Arraami, partiip taagaluarpaami killormut angallanneq pisinnaassasoq. Taamaattoq siunertarineqarunnanngilaq, danskit inuusuttortaat kalaallit ileqquannut pingaartitaanullu ilanngutitinniarneqarnissaat ingerlanneqassasoq, Erik Jensen allappoq.
Siunnersuut G60-imi politikkimut Danmarkimilu Kalaallit Nunaannut ministereqarfitoqaanut utersaartitsisoq folketingimut ilaasortaq, Siumumeersoq Aki-Matilda Høegh-Dam Konservativet nunatsinnut tunngasunut oqaaseqartartuat, Rasmus Jalov peqatigalugu TV2 Newsimi oqallinnermi oqarpoq.
Jarlov: Oqallinnermut peqataagitsi
Rasmus Jarlovip partiimi siunnersuutaa pillugu oqaluuserinnikkiartorlunilu qisuariaatinik tusarnaariartorluni ataasinngormat Nuuliarpoq.
Taassuma Siumup qisuariaataa uggoraa. Allaat isumaqarpoq Siumup siunnersuut – piaaraluni – atuarnerlukkaa.
- Ammasumik eqqarsartaaseqaraanni isillu ammatikkaanni allakkatta, Siumup tusagassiutinut allannermisut, taama paatsoortigisinnaagai uppererusunngilara, Rasmus Jarlov oqarpoq.
Taassuma siunnersuuteqarnikkut Kalaallit Nunaat pissaanermik akisussaaffinnillu arsaarniarsarinngikkitsik erseqqissaatigaa. Paarlattuanilli Kalaallit Nunaat aamma Danmarkimi naalakkersuinikkut sunniuteqarnerunissaa partiip kissaatigigaa oqarpoq.
Tamatuma saniatigut danskit, pingaartumik danskit inuusuttut nunatsinnut atuariartornikkut nunarput pillugu ilinniagaqarnerunissaat annikinneruvoq.
- Inuusuttut oqaloqatigiillutillu imminnut tikeraarnerisa akornutaasinnaanissaa takujuminaatsippara. Danskit amerlasuut Kalaallit Nunaannut tikeraarnissaat kissaatigaara, Rasmus Jarlov oqarpoq.
Siumup Katuami oqallinnissamut peqataaniannginnera taassuma pikkunaagaa.
- Oqallinnermi peqataanngikkaanni silatunerulertoqarsinnaanngilaq, taanna oqarpoq.
KNR-ip paasissutissaatai naapertorlugit Demokraatit Atassullu Katuami pingasunngornermi ualikkut nalunaaqutaq 16.30 suli peqataaniarput.