Konservative: Kalaallit savalimmiormiullu politikkikkut sulinermi akuunerulissapput
Danmark Kalaallit Nunaannut Savalimmiunullu tunngatillugu pimoorussilluanngippallaartoq Det Konservative Folkeparti isumaqarpoq.
Taamaammat partii naalagaaffeqatigiinni ataqatigiinnerulertoqarnissaanut maanna siunnersuuteqarpoq.
- Naalagaaffeqatigiit nukittorsarneqartariaqartut isumaqarpugut. Tassungalu Danmarkip imminut illersortuaannarunnaarluni suliaqarnerunissaa pisariaqarpoq, aamma Kalaallit Nunaannit kissaateqartoqarnissaa utaqqivarput, Konservative partiip Kalaallit Nunaat pillugu oqaaseqartartua, Rasmus Jarlov KNR-imut oqarpoq.
Det Konservative Folkepartiip Danmarkimi naalagaaffeqatigiit pillugit ministereqarfeqalernissaa kissaatigaa.
Tassani Kalaallit Nunaannut Savalimmiunullu tunngasut suliat nunanut allanut ministereqarfiup ministeriuneqarfiullu akornanni agguataarsiamasut katersorneqassapput. Uanili aamma allarpassuarnik suliassaqarpoq. Taamaammat naalagaaffeqatigiinnik kisimi suliaqartussamik ministereqarnissaa pisariaqarpoq.
- Danskit naalakkersuisuisa naalagaaffeqatigiit pillugit ukkataqarnerunissaat suliaqarnerunissaallu pisaraiqarpoq. Taamaammat naalagaaffeqatigiit qaninnerusumik atassuteqalernissaanik kisimi suliaqartumik ministereqartariaqarsoraarput, Rasmus Jarlov oqarpoq.
Siunnersuutip assinga Venstrep folketingimut 2019-imi qineqqusaarnermi siunnersuutigaa.
Konservativenit siunnersuut naapertorlugu ministereqarfik taanna kalaallimit savalimmiormiumiilluunnit ministeriuffigineqassaaq.
- Akisussaaffinnik allanngorterisoqarnissaanik isumaqanngilagut, kisianni akisussaaffigineqartut suli ataatsimoortut ullumikkumit pingaarutinneqartariaqarsoraagut, Rasmus Jarlov oqarpoq.
Danskit politikkianit attaveqatigiissut qaninnerusoq
Siunnersuut Kalaallit Nunaannit Savalimmiuniillu pissaanermik tigusiniarnerunngitsoq, Jarlovip erseqqissaatigaa. Nunalli danskit politikkianut sunniuteqarnerusariaqarput.
Taamaammat Nunanut allanut tunngasunut politikkikkut ataatsimiititaliaq inissanik marlunnik aamma allilerneqassapput. Inissat taakku partiip angissusaa aallaavigalugu ullumikkut agguaanneqartarput, taamaammat nunanit avannerlernit qinikkat peqataanatik.
Det Konservative Folkepartiip siunnersuutigaa
Naalagaaffeqatigiit pillugit immikkut ministereqarfeqalernissaa, taanna ukiumut 20 mio. koruuneqassaaq.
Naalagaaffeqatigiinni innuttaasunut sullissivinni allaffiit illoqarfinni arfineq-marlunni taakku ukiumut 70 mio. koruuneqassapput.
Kalaallit savalimmiormiullu Danmarkimi allaffeqarnissaannut ukiumut 20 mio. koruunit.
Inatsisartoqarfiit pingasut ukiumut katersuuttarnissaat ukiumut 1 mio. koruunit.
Efterskolemut, oqaatsinik kulturimillu ilinniarfinnut ukiumut 22 mio. koruunit.
Kalaallit Nunaanni sakkutuujusussaatitaanermut misilitsinneq: Taakku Illersornissaqarfiup missingersuutaasa iluanniipput.
Paasissutissarsiffik: "Et tættere Rigsfællesskab"
- Naleqqutinngilaq, pissutigalugu Nunanut allanut politikkikkut ataatsimiititaliani Kalaallit Nunaanni pingaaruteqarluinnartunik aalajangiisoqartarpoq. Folketingiimullu ilaasortat taakku marluk oqallinnernut akulerussinnaanissamut qinigaasut peqataasinnaalernissaat silatusaarneruvoq, Jarlov oqarpoq.
Tamatuma saniatigut nunanit avannarlernit folketingimut ilaasortaasut illersornissamut politiillu pillugit isumaqatigiinniarnernut danskit partiivinut atugassarititaasut assigalugit qaaqquneqassapput.
Aamma Inatsisartut, Folketinget Lagtingelu – suleqatigiinnermik oqaluuserinninnissamut ukiumoortumik ataatsimiittariaqarput. Tamanna nunanit akornanni nikittaattumik pisassaaq.
Nunatsinni allaffeeqqat amerlanerusut
Danmarkimi aamma nunatsinnut Savalimmiunullu qaninnerulissaaq.
Taamaammat Rigsombudip ataani nunatsinni arfinilinnik Savalimmiunilu ataatsimik allaffeeraqalernissaa partiip siunnersuutigaa. Innuttaasut tassani naalagaaffeqatigiinni tamarmi assersuutigalugu sulinissamut ilinniarnissamullu siunnersorneqarsinnaassapput.
Tamanna Danmarkimut avammut tunisinermut aamma pitsanngorsaataallunilu nammineq kajumissutsimik danskisut ilinniartitsinermut neqerooruteqarfiussaaq.
Tamatuma saniatigut Danmarkimi Kalaallit Illuutaat Savalimmiormiullu Illuutaat nunat naalagaaffeqatigiinnerlu pillugit ilisimasanik danskinut siammarterunerussapput.
- Nalunngilarput danskiunatik kalaalliusut. Kisianni danskisut innuttaassuseqarneranni Danmarkimi periarfissanik tamanik atuisinnaanissamut aamma tikilluaqqusaasariaqartut isumaqarpugut. Tamannalu ullormikkumit pitsaanerulersissinnaalluaripput isumaqarpunga, Rasmus Jarlov oqarpoq.
Naalagaaffimmit tapiissutinik 20 millioninik ilanngaasoqassasoq
Det Konservative Folkepartiip naalagaaffeqatigiinnerup attatiinnarneqarnissaa kissaatigaa. Partiilli nunarput pillugu oqaaseqartartuata siunnersuut ’naalagaaffeqatigiinnut tapersersuinertut akerliunertulluunniit’ isigineqassanngitsoq isumaqarpoq.
- Kalaallit Nunaaatami kissaatigiguniuk avissaarnissaq naalagaaffeqatigiinniikkunnaarnissarlu periarfissaraa. Taamaaliornissalli qinerneqannginnerani naalagaaffeqatigiit sapinngisaq tamaat ingerlalluartariaqarpoq, Rasmus Jarlov oqarpoq.
Siunnersuut tamarmi ukiumut 133 millionit koruuninik akeqartussatut missiliorneqarpoq. Aningaasat taakku annerpaartaat danskit karsiannit nassaarineqassapput.
AAMMA ATUARUK Allassimalerpoq: Illersornissaq pillugu Kalaallit Nunaat isumaqatigiinniaqataassaaq
Kalaallit Nunaallu Savalimmiullu ukiumut ataatsimoorlutik 20 millionit koruuninik tapersiissapput, taakku naalagaaffimmit tapinik tiguneqassapput.
Tamanna Rasmus Jarlovip oqarnera naapertorlugu naleqquppoq, nunattami Savalimmiullu aningaasaqarnerat Rigsombudip ataani allaffinnit ikiuisoqarneratigut pitsanngorsarneqassapput.
- Kisianni inerneratigut Kalaallit Nunaannut Namminersorlutik Oqartussanullu ullumikkumit annerusumik aningaasaliissuteqassaagut, Rasmus Jarlov oqarpoq.
Det Konservative Folkepartiip siunnersuutip oqallisigineqarnissaanut Nuummi Kulturip Illorsuanut Katuamut pingasunngorneq juunip ulluisa 29-anni nalunaaqutaq 16.30 qaaqqusivoq.
