Siumup IA-llu siulittaasuuffik avittussanngoraat
Folketingimi Kalaallit Nunaat pillugu ataatsimiititaliami, Aki-Matilda Høegh-Dam 2021-p tungaanut siulittaasunngorpoq. Ukiullu siulliit marluk ingerlaareerpata siulittaasuuffik Aaja Chemnitz Larsenimut tunniunneqassaaq.
Nunarput pillugu ataatsimiititaliami siulittaasuuffiup avinneqarnissaa, Aki-Matilda Høegh-Damip kissaatigisimallugu oqaatigaa.
- Suleqatigiilluarnissaq angorusullugu Nunarput pillugu ataatsimiititaliami siulittaasuuffik kisermaanniarnagu qangatuulli ukiut marlukkaarlugit naligiimmik avinneqartarnissaa isumaqatigiinniarnermi ataasiaannarnanga piumasaraara, Aki-Matilda Høegh-Dam oqarpoq.
AAMMA ATUARUK Kalaallit Nunaannut ataatsimiititaliami siulittaasuuffik talerperliit piumasaraat
Inuit Ataqatigiinnerup Aaja Chemnitz Larsenip 2021-mit 2022 ilanngullugu siulittaasuuffik tigussavaa. Siulittaasuuffissap avinneqarnissaa Aaja Chemnitz Larsenip ajoriffissaqartinngikkaluarlugu aappaatigooqartippaa:
Inuit Ataqatigiit qinersinermi kingullermi qinigaanerpaajusoq aallaavigalugu siulittaasuuffeqartariaqaraluartut, Aaja Chemnitz Larsen isumaqarpoq.
- Partiit suleqatigiit aallaavigineqartut paasivara, taamaattumik pakatsinarpoq, Aaja Chemnitz Larsen oqarpoq.
AAMMA ATUARUK Aleqa Hammond ataatsimiititaliami pisortatigoortumik siulittaasunngortinneqalersoq
Siumumiilli siulittaasuuffiup avinneqarnissaa kissatigineqarpoq:
- Ukiut sisamat tamakkerusussimanngilakka, nunarpulli sinnerlugu aallartitaqatiga qinigaaffimmi uani anngussaqarluarnissaanik aamma periarfissikkusuppara, Aki-Matilda Høegh-Dam oqarpoq.
Politikerit ataatsimiititaliani ilaasortanngortussat, siulittaasunngortussat siulittaasutullu tullersortinngortussat kingunersinnerpaamik sisamanngorpat nalunaarutigineqassasut, Folketingimi allattoqarfiup nalunaarutigaa.
2015-imi siulittaasuusut
Partii Venstrep Marcus Knuth Kalaallit Nunaat pillugu ataatsimiititaliarsuarmi 2015-imi siulittaasunngortippaat - Siumumilu Folketingimilu ilaasortaasimasoq, Aleqa Hammond siulittaasup tulliattut toqqarneqarluni.
Aleqa Hammondili 2017-mi januaarip aallaqqaataanit siulittaasunngorpoq, sulianilu aalajangiiffigisassani naalakkersuisunut tapersersortaaniarluni neriorsuilluni.
