DMI Piteraq pillugu: - Sakkortoorujussuuvoq

Tasiilami qulleq piterartoqarnissaanik kalerrisaarut ikumavoq. 

Anette Hartvig Nielsen DMI Kalaallit Nunaanneersoq taama oqarpoq. 

- Sakkortoorujussuuvoq ilungersunangaatsiarlunilu, taanna oqarpoq.

Anoraasuarnerit sekundimut meterinik 40-t 45-llu akornanni sakkortussusillit ataasiakkaallu sekundimut 47 meterinik sakkortussusillit massakkut uuttoortarneqarput.

Tamatuma saniatigut 16 gradenik issippoq 45-t 55-illu tungaannut issitsigisutut misiginarluni.

- Ukiuni qulingajanni maaniippunga. Taama sakkortutiginera qaqutikkut takusarpara, Anette Hartvig Nielsen oqarpoq.

Anorersuaq ukiup aatsaat taama kiatsigineranit tassanngaannarlu issilerneranit pinngorsimasinnaavoq.

- Taava taamaalissaaq, tassalu kiattup nillertullu assigiinngissutaat akerleriissitsilersarpoq.

Politiit mianersoqqusisut

DMI-p paasissutissiinera naapertorlugu, unnuap qeqqata tungaanut piterassaaq. 

Taamaattumik inuit silamut aninnginnissaat Kalaallit Nunaata Politiivinit kaammattuutigineqarpoq.

Politiit  pingasut tungaannut atuukkallartumik sivitsoqqinneqarsinnaasumilli Facebookikkut kalerriuteqarput.