Ulloq unnuarlu Piterareersoq: Ima peqqarniitsigaaq
Containerit marluk uppissimasut, illut qalissiai tingissimasut igalaanut matunullu tunngasut suliassat aqqaneq marluk.
Taakkuupput Tasiilami upalungaarsimasut ullaassaq tallimanngornermi Piterangaatsiarnerata kingorna ulapputigisaat.
Tunumi sekundimut 40-t meteritut sakkortutigisumik anoraasuartarnissaa Danmarkimi silasiorfiup DMI-p ippassaq aarlerisaarutigaat. Anorersuarneranilu ajoqusertoqaratarsinnaanera pinaveersaartinniarlugu innuttaasut angerlarsimaannarnissaat kaammattuutigineqarpoq.
Inunnik ajoqusertoqanngitsoq
Tunumi Piterarnera pissutigalugu pisariaqavissumik innuttaasunik qimarngutitsisoqanngitsoq, inunnilu aamma ajoqusertoqanngitsoq, Upalungaarsimanermut pisortaq Henrik Andreassen KNR-imut oqarpoq.
-Piterarnerup nalaani inunnik ajoqusertoqanngilaq, assigiingitsunulli orniguttarsimavugut. Soorlu puttasut nunamut atasoq ikaartarfilik inoqarluni nunamut atajunnaarpoq taannalu suliarineqarpoq, Upalungaarsimasut pisortaat Henrik Andreassen oqarpoq.
-Aap inuttai ajoquteqartutut arlaatigut tusagaqanngilanga uanga, kisianni soorunami piterarnerup kingorna ullaarli misissuilaarama quersuatta pingajorarterutingajaa tingissimavoq, taanna oqarpoq.
Taakku saniatigut containerit marluk aappaa anorimit uppisinneqarsimasoq aappaalu 30-t meterisut ungasitsigisumut tingitaasoq, illunillu aaqqissugassaqanngitsoq upalungaarsimanermut pisortap oqaatigaa.
Tunumi Piteraq maanna qaangiussimalerpoq, anorilu nakkisaap suffariullu akornanni maanna sakkortussuseqartoq, DMI-p silassamik ilimasaarummini kingullermi allappoq.
