VIDEO Kalaallit Nunaannut ataatsimiititaliami siulittaasuuffik talerperliit piumasaraat
Folketingimi ataatsimiititaliani assigiinngitsuni ilaasortat maanna inuttalersorneqarput.
Folketingemut qinersinermi partiip taaguunneqarpaasup, Kalaallit Nunaat pillugu ataatsimiititaliami siulittaasuutitaqartarnera nalinnginnaasuuvoq.
Tassalu siulittaasunngortussatut maanna ilimagineqartoq tassaavoq, Aaja Chemnitz Larsen Inuit Aqatigiit.
Maannakkorpiarli pissutsit imaapput, folketingemi Kalaallit Nunaat pillugu ataatsimiititaliami Venstret imaluunniit Dansk Folkepartiip siulittaasunngortitsinissaat.
Tamannalu Aaja Chemnitz Larsenimit sakkortuumik isornartorsiorneqarpoq.
Tamanna siornatigut pisimanngisaannartutut isigaara, tamannalu Danmarkip Kalaallit Nunaatalu akornanni pissutsinut ajorseriarneruvoq, Aaja Chemnitz Larsen KNR-imut oqarpoq.
Hammod isornartorsiuivoq
Siumut sinnerlugu Folketingimut ilaasortamit Aleqa Hammondimit tamanna isumakulunnartinneqarpoq.
- Uanilu erseqqissaassutigineqarpoq tungujortukkormiut, Kalaallit Nunaannut ataatsimiititaliami siulittaasuuffik namminneerlutik tigummerusukkitsik. Tunngvilersuutaannillu apuussisoqarani. Taamaattoqassappat taakkulu siulleermeerlutik siulittaasuutitaqalissappata, Kalaallit Nunaannut ataatsimiititaliaq siullermeersumik kalaaliunngitsumik siulittaasuutitaqalissaaq. Tamanna sumik tunngaveqarnersoq tusarliunneqanngilaq, Neriuppunga tamanna pillugu unnuumilaa tusarlerneqassallunga. Uanga Socialdemokraatit gruppeqatigisakka unnugu ataatsimeeqatigilerukkit apuussiffigineqassuunga, Aleqa Hammond oqarpoq.
Takorloorneqarsinnaavoq talerperliit siulittaasutut inuttaasussaq tassaajumaartoq qineqqusaarnerup nalaani tapersersortaasimasoq, taanna oqarpoq nangillunilu, talerperliit Dansk Folkeparti siuttoralugit oqaaseqarsimanngillat siulittaasuusussamit suna piumasariniarnerlugu.
Hammond siulittaasumut tullinngorsinnaavoq
Aammattaaq Grønlandsudvaligimi siulittaasumut tullinngorumaartoq assortuussutaasinnaavoq. Ileqquugaluarpoq partiimit nunatsinneersumit inuttalerneqartarnera.
Siumullu socialdemokratinik suleqateqarmat taanna Inuit Ataqatigiinniit ilimanaateqarneruvoq.
Taamaalilluni imaassinnaavoq Aleqa Hammond Grønlandsudvalgimi siulittaasumut tullinngortoq.
