Peqatigiiffik nutaaq Y-NINE inuusuttunik ataatsimoortitserusuttoq

Nunatsinni inuusuttut eqqarsartaatsimikkut peqqinnerulernissaat pillugu peqatigiiffik Y–NINE pilersinneqaqqammerpoq.

Allattoq Paarnannguaq Nielsen, Sikkersoq Rosing Karlsen

marsip 21-at 2026 10:20

Inuusuttut amerlasuut eqqarsaatipiluit akiortariaqartarpaat. Ilaasalu misigisaminnik oqaasinnguinissamut ajornakusoortitsisarlutik. Tamakkulu akiorniarlugit peqatigiiffik nutaaq Y-NINE pilersinneqaqqammerpoq.

- Nunatsinni inuusuttunut peqatigiiffissatut pilersitarput, imminortarneq akiorusullugu, taavalu inuusuttut eqqarsartaatsikkut tarnikkullu peqqissusaannut nukittorsaaqataarusulluta, Mora M. Kruse, Sabrina E. Jensen Kristen Petersenilu peqatigalugit peqatigiiffimmik pilersitsisoq, oqarpoq.

TUSAANNGA

Kiserliorpit aamma oqaloqateqarnissannik pisariaqartitsivit?

Kisimiinngilatit. Piffissani inuunermi pisumiluunniit artornartorsiorfimmi, nammineq sapikkaminnik pisoqaraangat, inuit amerlanerpaat tusaaneqarnissartik pisariaqartittarpaat.

Tusarnaarnissamut piffissaqarpugut. Tusaanngap siunnersortai tusarnaartarput, ilungersuutivillu oqaasertalernissaanut ikiorsinnaallutit. Aamma illit inuuninni pissutsit artornartut qanoq iliuuseqarfiginissaanut sakkussannik tunisinnaavaatsit.

Oqarasuaatikkut siunnersuisarneq tassaavoq kinaassutsimik isertuussilluni illit siunnersuisullu akornassinni inuttut oqaloqatigiinneq, tassani oqaloqatigiinnerup imaa illit aalajangissavat.

Meeqqat, inuusuttut inersimasullu tamarmik oqaloqateqarnissamik allaqateqarnissamilluunniit pisariaqartitsisut Tusaannga attavigisinnaavaat. Tusaanngamut attaveqarneq kinaassutsimik isertuussisinnaaffiuutigaluni akeqanngilaq – aamma Tusassit imaqanngikkaluarpalluunniit sianersinnaavutit allallutilluunniit.

Telefon: 80 11 80

SMS: 1899

Tigusiffik: Tusaannga

Inuiaqatigiit akornanni imminut toquttarnerup ajornartorsiutaanera pissutigalugu taanna pilersinneqartoq Mora M. Krusep ilanngullugu oqaatigaa:

- Immaqa tamatta immikkut aqqusaagaqarnikuuvugut, imminortarneq nunatsinni assut ajornartorsiutaagami inuusuttut akornanni. Tamatta immikkut qangali immaqa anguniagaqartareerpugut, amigaateqarluta peqatigiiffimmik immaqaluunniit arlaannik ataatsimoorfigisinnaasatsinnik, taanna oqarpoq.

Eqqartuinerunissaq neriuutigineqartoq

Inuusuttut qanoq misiginerminnik inuunermilu aqqusaakkaminnik eqqartuinerulernissaat taakkuninnga pingasunit pilersitsisunit neriuutigineqarpoq.

- Eqqartuinerulissasugut, qaammarsaassasugut aammalu soorunami pingaarnerpaaq imminut toquttarneq pinaveersaartinnissaa. Kisianni inuutilluta aqqusaagaqartuaannartussaavugut taannalu aqussinnaanngilarput. Kisianni qanoruna pitsannguisinnaasugut ataatsimooqatigiinnitsinni, ilaasortanut akisussaasoq Kirsten Petersen oqarpoq.

Imminullu toquttarnerup ammanerusumik eqqartorneqarnissaa pingaaruteqartoq. Inuusuttuullunilu qanoq misiginerup aamma oqaloqatigiissutigineqartarnissaa pingaaruteqarluinnartoq taakku ilanngullugu oqaatigaat.

Peqatigiiffimmi Y-NINE-mi pilersitseqataasut inuusuttunut ima kaammattuuteqarput:

- Eqqartuigit oqarit. Kimulluunniit oqarsinnaavutit aamma takorluukkanniit eqqartuinerup tiguneqartarnera ajunnginnerujussuuvoq. Inuusuttuaraalluni inuusuttuullunilu aamma pissutsit allaanerupput taamaammat aamma ilikkagassatit, ilinniagassatillu inissaqartikkit. Inuuneq aatsaat aallartippoq, Mora M. Kruse oqarpoq.

- Inuit tamaavitta siullerpaamik inuuvugut nunarsuarmi. Tamaavitta aamma nalornissuteqartarpugut taamaattumik oqarnissaq/oqaloqatigiinnissaq pingaaruteqartorujussuuvoq. Aammalu inuttut naleqarnerup nalunnginnissaa, Kirsten Petersen oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.