Siumup siulittaasua nipangersimajuarsinnarpoq
Hammondip anigaasanik atornerluisimanera assortorneqarsinnaanngikkaluarpoq. Inatsisartut kukkunersiuinermi ataatsimiititaliaata Aleqa Hammond unioqqutitsisimasoq isumaliutissiissuteqarluni qanittunnguakkut erseqqissaqqippaa.
Aamma atuaruk Aleqap Siumumit illuartitaanera qaangiuttoq
IA-meersorlu Agathe Fontain arfininngormat sakkortuumik qisuariaateqarpoq.
- Qanoruup ippassaq isiginnaarnerani tusaasinnaavara Kukkunersiuinermut ataatsimiititaliap isumaliutissiissutaa, Inatsisartut sapaatip akunnerata siuliani aatsaat naammassisaat, suusupagineqartoq isumaqarpunga. Tassami isumaliutissiisut imaqarami annertoorujussuarnik taavalu aamma inuiaqatigiinni sunniuteqarsimasorujussuarnik. Taamaammat suusupagineqartussaanngilaq ataqqineqartussaallunili. Inatsisartullu naqissuserpaat isumaliutissiissummik akuersinermikkut, taassuma imaani landskarsi annertuumik atornerlunneqarsimasoq, Agathe Fontain oqarpoq.
Aamma atuaruk Fontain: Nunatta karsianit atornerluinerit amerlanerupput
Aleqa tulluusimaarpoq
Taamaakkaluartoq Aleqa Hammond KNR-mit tallimanngormat apersorneqarnermini peqqissiminngilaq.
- Politikerit allat uanga pineqarnittut pineqarnissaat kissaatiginngilara. Aamma isumaqarpunga, politikerit allat aamma sinnerlugit kinguneqartitsiffigineqartunga, arlaammi kinguneqartitsiffigineqartussaavoq, tulluusimaarutigaaralu kingunerusussat uannut tummata, Aleqa Hammond oqarpoq.
Aamma atuaruk VIDEO Hammond uummateqarfigisani pillugu
Pisoq pillugu partiip avataaniinnaanngitsoq assuarinnittoqarlunilu aalassassimaartoqarpoq. Partiimimi ilaasortat ilaat qisuariarput.
Parteeqataata assuaraa
Siumut sinnerlugu Inatsisartunut qineqqusaarnikuusup, Karen Motzfeldtip Naalakkersuisut siulittaasuanut maamma allattaasoq, politikkeritut facebookiminut Aleqa Hammondip folketingimut qineqqusaartitassatut Siumumit siulersuisuunernit akuerineqarnera pillugu ullumikkut qisuariaateqarpoq.
Tassani sakkortuumik assuarinnippoq:
- Innersuussineq uanga isumakulunnartippara. Siumut nutaajusutut tatiginarnerusutut saqqummiunniarnera ajutoorpoq. Ilumut, eqqartuussisoqarnikuunngilaq. Kisianni peqqissiminermik ersersitsineq aammalu aqqutissiuussinissamik piumassuseqarneq amigaataavoq. Inuit ileqqorissaartuunitsinnik inuiaqatigiinnut takutitserusunnerup soorluuna qatagiinnaripput, Karen Motzfeldt allappoq nangillunilu.
- Aappaattut isumaqarpunga uagut nalitsinni inuk assortuussutaanerpaap nunanut allanut qineqqusaartinneqarnerata Siumup siulersuisuunerisa pilersaarusiorsinnaasuseqannginerannik ersersitsisuusoq, Karen Motzfeldt oqarpoq.
Aamma atuaruk VIDEO Aleqap politikkikkut uteqqinneranut isummat assigiinngitsut
Kielsen oqaaseqarumanngilaq
Siumumit folketingimut qinigassanngortittut pillugit Kim Kielsen KNR-mit oqaaseqartinniaraluarparput, saaffiginnissutitsinnulli tunngatillugu Siumumi allattaanerup oqaluttuuppaatigut, Kim Kielsenip oqaaseqarnissani kissaatiginngikkaa.
