Aleqap Siumumit illuartitaanera qaangiuttoq

Aleqa Hammondip folketingimut Siumut tunuliaqutigalugu qinigassanngortinnissaa partiip siulersuisui aalajangerput.

Aleqa Hammondip nunatta karsianit akiliutsikkallarsimanera inuiaqatigiinnit kamassaatigineqarpoq, Nuummili oqaluffiup aappaata eqqaani siorna akerliussutsimik takutitsipput.

Akerliussutsimillu takutitsereernerup kingorna ullualuit qaangiuttut Inatsisartunut qinersinissaq, Aleqa Hammondip nalunaarutigaa.

Aleqa Hammond Naalakkersuisut siulittaasuatut Siumumillu siulittaasuattut aamma tunuarpoq.

Aamma atuaruk Krusep akiligassaqarsimaneq ”akueriumanngilaa”

Partiip qullersartaavisa isummatik qinersinissap tungaanut erseqqissumik saqqummiuppaat. Atornerluineq ileqqorlunnerlu Siumup akuersaanngilluinnarpaa.

- Pisussaaffigaarput eqqumaffigissallugu qinigaagutta malitassagut suuppat. Inuit eqqumaffiginngitsoortarsimasaat tassaapput malitassat malittarsimannginnamikku. Taannalu partiip iluani soorunami aaqqitassaraarput, aammalu aaqqissallugu isumaqatigiissutigalugu, Karl Kristian Kruse Qulaarpaami ukioq kingulleq taama oqarpoq. 

Siumut gruppia tamakkerlugu aamma erseqqilluinnartumik isummerpoq.

Siumup Inatsisartuni ilaasortaatitaasa Naalakkersuisut Siulittaasuata Aleqa Hammondip Namminersorlutik Oqartussanut akiligassaqarsimanera akuersaanngilluinnaraat, Karl Kristian Kruse partiimi Inatsisartunut ilaasortaatitai sinnerlugit septembarip 28-ani oqarpoq.

Eqqartuussivimmi pineqaatinneqarsimanngittoq

Aleqa Hammond tunuarmat qaammatit arfineq pingasut qaangiussimalerput. Siumup Aleqa Hammond maanna iluarineqaqqilersimavoq, naalakkersuisullu siulittaasuattut tunuarsimasoq atorfissaqarnersoq, partiip innuttaasut maanna aperai, folketingimut junip 18-iani qinersinermi akisassanngorlugu.

Hammondip aningaasanik atornerluisimanera assortorneqarsinnaanngikkaluarpoq. Inatsisartut kukkunersiuinermi ataatsimiititaliaata Aleqa Hammond unioqqutitsisimasoq isumaliutissiissuteqarlutik qanittunnguakkut erseqqissaqqippaat.

Taamaakkaluartoq Siumumi siulittaasup tulliata Jørgen Wæver Johansenip erseqqissarpaa Aleqa Hammond Siumumit saammaanneqareertoq, eqqartuussivimmilu pineqaatissinneqarsimanani.

Taamaammallu Hammondip qinigassanngortinnera ajortussaqartinngilaa.

- Nalunngiivipparput inuit assigiinngisitaartumik isumaqarfigisinnaagaat, kisianni aamma qinersisartut qinersinermikkut namminneq aaliangigassaraat kikkut piukkunnarnerusutut isumaqarfigissanerlugit, Jørgen Wæver Johansen taama oqarpoq.

Radioaviisip Naalakkersuisut siulittaasuat Kim Kielsen pissarsiariniaraluarpaa napparsimammalli iluatsinnagu.