VIDEO Aleqap politikkikkut uteqqinneranut isummat assigiinngitsut

Aleqa Hammond nunatta karsianit atornerluisimammat ukioq kingulleq qinerseqqittariaqalerpugut. Folketingimullu maanna qineqqusaarnialermat tamanna Nuummiut avissaartuussutigaat.

Aleqa Hammond Namminersorlutik Oqartussat naatsorsiuusiornermi ilitsersuummi najoqqutassiaannik unioqqutitsisimasoq, Inatsisartut kukkunersiuinermi ataatsimiititaliaata isumaliutissiissutimini naqissuserpaa.

Siumumi siulittaasup tulliata Jørgen Wæver Johansenip taanna oqaaseqarfigalugu erseqqissarpaa Aleqa Hammond Siumumit saammaanneqareertoq, eqqartuussivimmilu pineqaatissinneqarsimanani.

Aamma atuaruk Aleqap Siumumit illuartitaanera qaangiuttoq

- Eqqartuussivimmi eqqartuunneqarsimanatik sassarusuttut taakku periarfissinneqarnissaat soorunami inissaminiippoq aamma uagut Siumumit immitsinnut eqqartuussisunngortissanngilagut. Inuiaat ima ikitsingaagut piginnaanilittortagut tamaasa malersorlugit piniarutsigit erngiinnaq immitsinnut tamakkertussaavugut, Jørgen Wæver Johansen KNR-imut oqarpoq.

Aamma atuaruk Fontain: Nunatta karsianit atornerluinerit amerlanerupput

Naak Aleqa Hammond Siumumit iluarineqaqqilersimagaluartoq, imaanngilaq innuttaasut  aamma iluarinneqqilersimasut.

inuit Aleqa Hammondip politikkimut uteqqinnera pillugu tusarniarlugit, Qanorooq Nuummi illoqarfiup qeqqani tallimanngormat angalaarpoq.

Isummallu assigiinngiiaarput, ilaat tapersersuisut ilaallu tapersersuinngitsut.

-  Aleqap isigineqarnera kusanarpallaanngilaq. Maani atorsinnaanngikkaanni taava Qallunaat Nunaanni politiikerinngorniarneq eqqortuusorinngilara. Neriuutingaara kalaalerpassuit Aleqamit qinersissanngitsut, Allan Gaardbo oqarpoq.

- Soorunami eqqarsaallannarpoq tusaqqaarakku. Qamuuna aalassappunga, eqqarsaatigillualerakkulu isumaqarpunga sapiittoq, sulilu sulerusunnini takutippaa, Sigrid Stork oqarpoq.

- Ikitsigereertingaluta  nunatsinni kikkulluunniit politikkimut suliniuteqarusuttut ammaffigisariaqarpagut. Nunatut ingerlaqqissagutta, Inuuteq Kriegel oqarpoq.

- Aleqap Kalaallit Nunaat Qallunaat Nunaannit avissaartikkusukkamiuk, taava eqqumiingaara Qallunaat Nunaanniikkusuttoq. Sooq taava maani nunatsinni sulerusunngila, Karoline Frederiksen oqarpoq.

- Assersuutigiinnarlugu inuit kukkusut imaluunniit arlaatigut pissusilersortut eqqunngitsumik tamaasa tunuartitertassagutsigit isumaqarpunga eqqortuunngitsoq, Lillian Petrussen oqarpoq.

Aamma atuaruk VIDEO Hammond uummateqarfigisani pillugu

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat