VIDEO Hammond uummateqarfigisani pillugu
Siumup qinigassanngortitani sisamaasut sisamanngormat unnukkut avammut saqqummiuppai. Tamatumalu tusagassiutitigut sammineqarnerani qinigassanngortittut allat Martha Abelsen, Pitsi H. Høegh aamma Erik Jensen sammineqarpallaaratik, Aleqa Hammondip nunatta karsiata aningaasaataanik atornerluisimanini pissutigalugu siulittaasutut tunuarnerani ukiarlu qinerseqqittariaqalerneq sammineqarneruvoq.
Maannalu politikkikkut sulileqqinnissaminut piareersimavoq, qinigaariataassagunilu Danmarkimut nuussaaq Kalaallit Nunaata namminiilivinnissaa tassanngaanniit sulissutigissallugu.
- Imaannaasussaanngilaq uagut Danmarkimut nukittorsaassasugut Naalagaaffeqatigiit nukittorsassallugu. Danmark aamma nunatsinnik nukittorsaaqataasussaavoq.
- Aamma qunugisassaanngilaq oqaaseq naalagaaffinngornissaq. Tamatta ataatsimoorfigalugu ilusilersugassarivarput, Aleqa Hammond KNR-imut taama oqarpoq.
Aleqa Hamondip apersorneqarnera uani takuguk:
Aamma atuaruk Fontain: Nunatta karsianit atornerluinerit amerlanerupput
Aamma uani atuakkit kukkunersiuinermi ataatsimiititaliap nalunaarusiaani ilanngussaq aamma 2013-imut Nunatta Karsiata naatsorsuutaa.
Akileereerpoq
Naalakkersuisut siulittaasorisimasaata nunatta karsiata aningaasaataanik atornerluisimanera, siorna septembarimi 106.363,27 koruuninut naatsorsorneqartoq pillugu inuit isumaat avissaaqqapput - ilaasa ajorinngilaat allallu ajoralugu. Aleqa Hammondillu taakku nukittorsaatigisimanerarpai.
- Uppitinneqaqqajanngilanga, nukittorsarneqarpunga. Aamma inuit akiliisussat sinnerlugit taanna isumaqarpunga aamma uanga akilerlugu.
Aamma atuaruk Aleqap Siumumit illuartitaanera qaangiuttoq
Siulersuisuunernit tamarmiusunit taperserneqarpoq
Aleqa Hammond Qanoruumi tallimanngormat apersorneqarami kisimiilluni nunatta karsianik atornerluisimannginnini erseqqissarpaa.
- Isumaqarpunga Naalakkersuisuusarsimasut amerlaqisut, aamma uanga sioqqullunga, ilaqutaasa imaluunniit namminneq angalasarsimanerannut tunngatillugu akiliunneqarallartarsimanerat pillugu sukaterinissaq pisussissamisoortoq. Aamma taamaassaaq. Isumaqarpungalu tassunga atatillugu akisussaaffik tamakkiisoq nammallugu tigummivara, aamma iliuuseqarfigalugu.
Aleqa Hammondip innuttaasut kina qinissanerlugu namminneerlutik nalilersuisinnaanerat tatigivaa.
- Qinersisartut aalajangissavaat tatiginassuseq qanoq ittoq inuiaqatigiinnut sinniisussaminnut atuutsissanerlugu.
Aamma atuaruk Uppernarsaatit: Akisunermi angalanerit, nerinerit unnuakkullu barimiinnerit
- Politikeritut sulininni sumilluunniit uannut uparuartuutigineqartut tusaasarpakka pingaartutullu isigalugit. Isumaqarpungalu politikeritut sulissagaanni, akisussaaffik tamakkiisoq nammassinnaassuseqarfigalugu assoralisaarfeqaraluaruttaluunniit taanna pisussaaffigaarput tigussallutigu.
- Allatuulli pisinnaatitaaffiga, piumasaqaatinillu naammassinninneq tunngavigalugu sassarternera, siulersuisuunerit tamakkiisut tunuliaqutsermannga nuannaarutigeqaara, Aleqa Hammond taama oqarpoq.
Juunip 18-iani Folketingimut qinersisoqassaaq.
