Siumup qinigassanngortitaa: Palle Christiansen ajorsartissinnaavara
Lisa Svenningsen, ilinniartitsisutut ilinniarsimasoq meeqqallu atuarfianni sulinermik misilittagaqartoq isumaqarpoq maannamut Namminersorlutik Oqartussat sanngeequtaasa pingaarnerit sulinermilu ileqquisa ilaat qullersarfiup sorliup tamanna akilissaneraa qimattariaqarluinnarparput. Tamanna pissaaq suliniutit suulluunniit ataqatigiisaarneqarnerisigut tamannalu ataasiakkaanut ilami tamatsinnut allaat iluaqutaassammat.
-Nunami maani kikkut tamarmik atorfissaqartinneqarfigisaanni piginnaasatsigut nukittuffeqarlutalu sanngiiffeqarpugut aalisartuugutta piniartuuguttaluunniit, ilinniagartuujugutta, eqqiaasuugutta, nakorsaagutta imaluunniit politikeriugutta allaat – ilinniaqarsimasoq ilinniagaqarsimanngitsorluunniit. Meeqqap inuunera naartuulernermininngaanniit, inunngorneranut, meeqqerivimmiittalerneranut, erniinnaq Meeqqivitsialammiilerneranut kingusinnerusukkullu atualerneranut ilinniagaqalerneratalu ingerlannissaa ilanngullugit ataqatigiissuusariaqarpoq, Lisa Svenningsen nassuiaavoq.
Siumut tunuliaqutaralugu qinigassanngortittup angajoqqaat meeqqallu ikiorniarlugit siusissukkut suliniuteqartoqartarnissaa pingaartippaa, taamaaliornikkut meeqqat ilinnialinnginneranni naatsorsuutigisat naapertuuttunngosarneqarniassammata. Taamaaliornikkut meeqqat inuusuttullu pitsaanerpaamik ilinniartitaanissaat inuiaqatigiittut qulakkeersinnaassavarput.
- Uanniit isigalugu meeraq atualersinnagu meeqqamut ilaqutaasunullu ikiorsiinisssaq sapinngisaq tamaat annertusarneqarsinnaavoq tamannalu uanga nalunngilara qanoq pingaartigisoq. Meerarlu atualeraangat eqqortumik ikiorsiinerit massakkornit piaarnerusumik aallartinneqarsinnaassapput massakkutut meeraq ukiuni 5-6-ni utaqqiseqqaarlugu pinnatik. Tamanna kanngunaqaaq aamma isumalluutinik akisuunik atornerluineruvoq inuttut inuiaqatigiinnullu aningaasarpassuarnik naleqartarpoq, Lisa Svenningsen isumaqarpoq.