Siumumi siulittaasussarsiulersut: Sassartut pingasut tamarmik tapersersorteqartut
Naqqitaq:
Allaaserisami siusinnrusukkut allassimavoq, Siumut Aasianni immikkoortortaqarfiani Kim Kielsen piukkukkaat. Aamma siulittasoq Arne rafaeilsen issuarparput oqarpoq,
Aasianni saqqummersartut, isummaminnik ersersitsiniartartut Kim Kielsen pileriginerugaat. Kisianni taakkua kukkunerupput. Arne Rafaelsen oqarpoq. ”Aasianni saqqummersartut, isummaminnik ersersitsiniartartut Kim Kielsen pileriginnginnerugaat”
Kukkunerput ajuusaarutigaarput.
Siumup nuna tamakkerlugu ataatsimeersuarnissaa juulip ulluisa arfineq pingajuannit qulingata tungaanut pisussaagaluartoq, Covid 19-ip ajornartorsiutaanera pissutigalugu ulloq ataaseq tassalu juulip ulluisa qulinganni ataatsimeersuartoqassasoq partiimi siulersuisuunerit maajimi aalajangerput.
Ataatsimeersuarnissamilu siulittaasussamik qinersisoqassaaq. Sinerissamiillu siulittaasussatut piukkunneqartut assigiinngillat.
AAMMA ATUARUK Siumup immikkoortortaqarfii: Ataatsimeersuarnissaq ukiarumut kinguartilli
Siumut Aasianni immikkoortortaqarfiani Kim Kielsen piukkutinngikkitsik, siulittaasoq, Arne Rafaelsen, oqarpoq:
- Siusinnerusukkulli isumasiuisarnitsinni, siulittaasutut maluginiarpara, Aasianni saqqummersartut, isummaminnik ersersitsiniartartut Kim Kielsen pileriginnginnerugaat. Tassa taanna uanga maluginiagara erseqqissumik oqaatigisinnaavara.
Arne Rafaelsen taama oqarpoq.
Siumulli Qeqqata Kommuniani immikkoortortaqarfianeersup, nunaqarfimmi Sarfannguani siumup siulittaasuata tullia Najaaraq Goliathsenip Erik Jensen Siumup siulittaasussaattut piukkuppaa:
- Tassa isumaqarama uummaarittorujussuaq taavalu siuttuusinnaasoq.
Sarfannguaneersoq Najaaraq Goliathsen, taama oqarpoq.
AAMMA ATUARUK Avisi: Kim Kielsen Siumumi siulittaasutut ingerlaannarusuppoq
Tunumulli ikaariarutta, Siumut siulittaasussaanik qinersinissamut ullut suli arlaqarmata, sassartoqaqqinnissaa suli ilimanaateqarsoraat. Taamaammat maannangaaq kina toqqarniarneqarnersoq oqaatigisinnanngikkallaritsik, Inatsisartunut aamma Siumup Tasiilami immikkoortortaqarfiani ilaasortaq Laura Taunajik oqarpoq.
- Taamanikkussamut piukkussara toqqarumaarpara, maannakkorpiaq oqarsinnaanngilanga kina qinerniarnerlugu.
Laura Taunajik, taama oqarpoq.
Siumut Qaqortumi immikkoortortaqarfianiit Vivian Motzfeldtip siulittaasussatut sassarnera nunaqqataasa nuannaarutigalugu oqarput, eqqartueqatigiinnissarli pisariaqartikkitsik, siulersuisuni ilaasortaq Kaaliina Lundblad oqarpoq.
- Tassa taanna oqaatigisinnaanngilara. Ippassaq aatsaat Kim nalunaarpoq, suli naapinngilagut, tamanna eqqartoqqaartariaqassavarput.
AAMMA ATUARUK Vivian Motzfeldt Siumumi siulittaasunngorusuttoq
