Inatsisartuni siulittaasup, Vivian Motzfeldtip, Siumut sinnerlugu siulittaasussarsiortoqarnissaanut atatillugu sassarniarluni nalunaarutigaa.

Vivian Motzfeldt Siumumi siulittaasunngorusuttoq

Siumumi siulittaasussarsiortoqarnernissaanut allamik sassartoqarpoq.

Siumut nuna tamakkerlugu aasaru ataatsimeersuartitsilerpat siulittaasumik toqqaasoqartussaavoq, siulittaasussarsiornissamullu allamik maanna sassartoqarpoq.

Inatsisartuni siulittaasup, Vivian Motzfeldtip, Siumut sinnerlugu siulittaasussarsiortoqarnissaanut atatillugu sassarniarluni nalunaarutigaa.

Suliffiit ilinniartitaanerlu

Tallimanik pingaartitaqarluni siulittaasunngorniunnermut sassarpoq. Siullertut amerlannginnatta avissaartuunnissatsinnut akissaqanngitsugut allappoq. Inatsisartuni, partiip iluani, nunap immikkoortuini inuiaat ataatsimoortariaqartut, Vivian Motzfeldt allappoq.

AAMMA ATUARUK Kruse: Kielsen Siumup siulittaasuattut sassaqqissaaq

- Namminiilivinnissatsinnut suliat pingaartikkutsigit - ajugaaqatigiittariaqarpugut, ikioqatigiittariaqarpugut - inuiaammi avissaartuussimasut namminiilivissinnaanngillat - inuiaat avissaartuussimasut tamatigut ajugaaffigiuminarnerusarput, Vivian Motzfeldt allappoq.

Aamma sineriammi ineriartortitsinerusoqartariaqartoq allappoq. Nuummi ineriartornermut suli tapersersuilluni allappoq, sineriammili illoqarfiit allat ineriartortinneqartariaqartut siulittaasunngorniartoq allappoq.

- Taamaammat pisortat suliffeqarfiutaannik sineriammut siammartitsinerunissaq pisariaqartinneqarpoq, naammassisaqarfiusumillu oqaasiinaatinnagu suliarineqartariaqarluni, Vivian Motzfeldt allappoq.

Tamatuma saniatigut nunatta kommuninut agguataarsimanera nalilersoqqissaartariaqarsoraa. Qaasuitsup Kommuniata nalilersorneqareerluni avinneqarnera asserssuutigalugu Kommuneqarfik Sermersuumut nalilesuisoqartariaqartoq, Vivian Motzfeldt allappoq.

- Uanga qularinngilara tatigalugulu Tasiilami eqqaanilu innuttaasut inuunerminnut akisussaaffimmik annerusumik tigusinissaminnut piareeqqassut, Motzfeldt allappoq.

AAMMA ATUARUK Tusagassiuutit: Erik Jensen naalakkersuisuujunnaalerpoq

Aamma nunatta pisuussutai atorluarneqarnissaannut ilinniartitaaneq pitsanngorsaaffigineqartariaqartoq taanna isumaqarpoq. Illuatungeriillu naligiittutut imminnut isigalutik suleqatigiittariaqartut allappoq.

- Imaanngilaq Nunatta siornatigut aalisagartassiissutit aalisarnissaannut nukissaqarsimanngimmat, taava pissusissamisoortumik pisassatsinnik ilanngartuiffigineqassasugut, Vivian Motzfeldt allappoq.

Allanit inangerneqassanngilagut

Kinaassusittali inuiaqatigiinnik ingerlatsinermi ataqqineqarlunilu naleqartinneqarnissaa taassumunnga pingaarnerpaajusoq, Vivian Motzfeldt allappoq.

- Inuiaat kalaallit namminneq nunaminni oqartussaassuseqarnerpaasutut inissisimajuarnissarput qulakkeerneqartariaqarpoq, imaanngitsoq arlaanni itissasugut nammineq nunagisatsinni allanit inagerneqarsimalluta, Motzfeldt allappoq.
Siumumi siulittaasussarsiornermi maannamut sassartut ikinnerpaamik marluusut tassaalerput, Vivian Motzfeldt aamma Erik Jensen.

Taamatuttaaq Siumumi siulittaasoq, Kim Kielsen, qinigassanngorteqqissasoq oqaatigineqarpoq. Karl Kristian Kruse KNR-ip radiokkut aallakaatitassiaani "Inuiaat Tillernerat"-ni sapaatip-akunnerani kingullermi apersorneqarnermini taama oqarpoq.

Siumup siulittaasuata Kim Kielsenip Siumumi siulittaasunngorniuttoqalerpat sassaqqissanani aggustip qaammataani oqaatigigaluarpaa.

Vivian Motzfeldt kujataaneersuuvoq, tunngaviusumillu inatsisissaq pillugu isumalioqatigiissitami siulittaasuunikuulluni.

Inatsisartuni siulittaasunngunnginnermini nunanut allanut naalakkersuisuuvoq.

Vivian Motzfeldt 47-nik ukioqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat