Kruse: Kielsen Siumup siulittaasuattut sassaqqissaaq
Siumup siulittaasuata Kim Kielsenip Siumumi aasaru siulittaasunngorniuttoqalerpat sassaqqissanani tusagassiuutinut aggustip qaammataani oqaatiginikuugaluarpaa.
Maannali isumaa allanngorsimasoq partii Siumumi siulittaasup tulliata Karl Kristian Krusep KNR Radiop aallakaatitassiaanut Inuiaat Tillernerani apersorneqarluni oqaatigaa.
- Siulittaasoq sassaqqinniarpoq, taavalu nutaanik sassartoqarpoq. Aamma neriuppunga allanik nuisoqarsinnaassasoq, Karl Kristian Kruse oqarpoq.
AAMMA ATUARUK Kielsen maannakkut tunuarnianngilaq
Sassartup aappaa tassaavoq Erik Jensen. Taanna Kim Kielsenip naalakkersuisunut siulittaasuunerani suliffeqarnermut aatsitassanullu naalakkersuisuugaluarpoq novembarimi tunuarluni. Tunuarnermini Siumumi siulittaasunngornissamut sassarnissani ilaatigut tunngavilersuutigalugu.
- Siunniuteqqavara. Tassa taanna sulissutigissavara. Aamma angussaqqaarpara. Taanna upperaara, Erik Jensen KNR-imut oqarpoq.
Krusep sassaqqinnissani suli eqqarsaatigaa
Siumumilu siulittaasup tulliata Karl Kristian Krusep siulittaasunngorniuteqataassanerluni suli aalajangerani Inuiaat Tillerneranut oqaatigaa.
AAMMA ATUARUK Tusagassiuutit: Erik Jensen naalakkersuisuujunnaalerpoq
- Siulittaasup sassaqqinniarnani siorna nalunaaruteqarnerata kingorna apersorneqarlunga eqqarsaatigissallugu oqariartornikuuvunga. Kisianni unneqqarillunga oqaatigissavara isummerfiginikuunnginnakku suli, Karl Kristian Kruse oqarpoq.
Partii Siumut Ilulissani aasaru juulip arfineq-pingajuannit qulingata tungaanut ataatsimeersuartitsissaaq.