Siumup immikkoortortaqarfii: Ataatsimeersuarnissaq ukiarumut kinguartilli
Siumup immikkoortortaqarfii kujataani, tunumi, avannaani qeqqanittulluunniit isumasioraanni akissut assigiippoq: Ataatsimeersuarnissaq ukiamut kinguartilli.
- Qanimut naapilluni oqaloqatigiinneq ataatsimiinnerlu immersoqatigiiffiusarpoq. Taamaattumik tunngavissat tunaartassallu annerusut oqaloqatigiinnikkut nassaariortorneqartarlutik, Siumut Tasiilamit Laura Taunajik oqarpoq.
AAMMA ATUARUK Siumumi siulittaasumik qinersineq qarasaasiatigut ingerlanneqassasoq
Sermersuaq qulaallugu Aasiannut ituikkutta kissaatigineqartoq aamma taamaappoq:
- Uagut isumaqarpugut kinguartinneqartariaqartoq. Pilersaarutillu malillugit ataatsimoorluta ataatsimeersuartinneqartariaqarluta uatsinnut isigaluta erseqqissumik isummersorsinnaalluta, Siumut Aasianni siulittaasoq Arne Rafaelsen taama oqarpoq.
Oqallinnissat aappaagumut kinguartut
Siumup siulittaasussaanut juulip qulingani qarasaasiakkut qinersisoqassaaq. Partiip Ilulissani juulip arfineq-pingajuannit qulingat ilanngullugu ataatsimeersuartussaagaluarpoq. Nappaassuarli coronavirusi ajornartoortitsimmat ataatsimeersuarnissaq qarasaasiakkut ulluinnarlugu pissasoq siulersuisuuneri maajimi aalajangerpaat.
Tamatuma kinguneraa, partiip ukiunut tulliuttunut anguniagai, oqallinnerillu aappaagumut kinguartinneqarnerat.
Partii nuna tamakkerlugu 65-inik immikkoortortaqarfeqarpoq. Taamaammat partiip siunissaa oqallisigineqartinnagu siulittaasussamik qinersinissaq pissusissamisuunngitsoq Siumup Nuummi immikkoortortaqarfiani siulittaasoq isumaqarpoq.
- Ataatsimeersuarnermi siulittaasumik taasinissaq kisimi pisussaannginnami. Anguniakkat eqqartorneqarnissaat soorunami pisariaqartinneqarpoq ataatsimeersuartussaagatta.
- Oqarasuaatikkut qarasaasiatigulluunniit tamanna ingerlanneqassappat kipiluttunalaarsinnaassagami. Taamaattumik ataatsimeersuarnissap kinguartinnissaa (siulersuisuunernut aaqq.) kaammattuutigaarput, Siumut Nuummi siulittaasoq Inga Dora G. Markussen oqarpoq.
AAMMA ATUARUK Avisi: Kim Kielsen Siumumi siulittaasutut ingerlaannarusuppoq
Kujataamiut isumaqataapput:
- Qinnutigaarput ataatsimoornissarput ataatsimeersuarnissarlu kinguartinneqassasoq immikkut ataatsimeersuarnermik taallugu, 00:02:53Kaaliina Lundblad Siumut Qaqortumeersoq oqarpoq.
Siumup siulersuisuunerisa partiip immikkoortortaqarfiisa kissaataat pillugu aqagu arfininngornermi ataatsimiissasut apersukkatta aamma paasissutissiissutigaat. Aamma Siumup aaqqissuusaanerani siulittaasup tulliata Evelyn Frederiksenip ataatsimiinnissaq KNR-imut uppernarsarpaa.
Ataatsimeersuarnissaq kinguartinneqassanersoq pilersaarutilluunniit malillugit juulip qulingani pissanersoq aalajangiiffigineqareerpat avammut nalunaaruteqarumaarlutik partiip allattaa Miki Jensen allakkatigut paasissutissiivoq.