Siumumi siulittaasumik qinersineq qarasaasiatigut ingerlanneqassasoq

Partiip siunissaa pillugu oqallinnissaq aappaagumut kinguartinneqarpoq. Siulittaasumilli qarasaasiatigut taasisoqassaaq.
Vivian Motzfeldt og Erik Jensen har indtil videre bekræftet, at de stiller op til formandsvalget i Siumut i juli. Assi © : KNR / Malik Brøns
Allattoq Jens Betak
maajip 25-at 2020 16:52
Nutserisoq Jaaku Lyberth

Nunatsinni pissutsit nalinginnaasumik ingerlaleriartorneranni, nunattalu juunip ulluisa 15-anni ammaqqinneqarnissaannut Inatsisartut tamarmiullutik  akuersereersullu, Partii Siumut nuna tamakkerlugu ataatsimeersuarnissaa juulip ulluisa qulinganni pisussanngorpoq.

Ataatsimeersuarneq juulip ulluisa arfineq pingajuannit qulingata tungaanut pisussaagaluartoq,  Covid 19-illi ajornartorsiutaanera pillugu partiimi siulersuisuunerit aalajangerput ulloq ataaseq tassalu juulip ulluisa qulinganni ataatsimeersuartoqassasoq.

Ataatsimeersuarnermi  siulersuunerit, inatsisartuni ilaasortat, Siumut inuusuttai  partiimilu immikkoortortaqarfiit Ilulissani ataatsimeersuartussaagaluarput. Covid 19-nili pissutigaluugu ataatsimeersuarnissaq isiginnaarutikkut oqarasuaatikkullu ingerlanneqarnissaaq

Tamatuma kinguneraa, ukiunut tullittunut partiip anguniagai, oqallinnerillu aappaagumut kinguartinneqartariaqarlutik.

AAMMA ATUARUK Vivian Motzfeldt Siumumi siulittaasunngorusuttoq

Juulip ulluisa qulingani  ataatsimeersuarnermi,  oqaluuserisassani pingaarnerit ilagissavaat siulittaasussamik qinersineq, siulersuisuunernullu ilaasortassanik qinersineq. Ataatsimeersuaqataasut najuutinngikkaluarlutik qinersinissamut periarfissaqassapput.

Taama isumaqarput Siumumi siulersuisuunerit:

COVID-19-p kingunerisinnaasai eqqarsaatigalugit partii taama aalajangertariaqalersimavoq. COVID-19 juulimi suli ajornartorsiutaasinnaanera ilisimanngilarput. Nuna tamakkingajallugu, illoqarfinniit nunaqarfinniillu ataatsimeersuariartoqartussaagaluarpoq taamaattumik immikkut iliuseqarnikkut mianersortariaqarpugut.

Siulittaasussamik qarasaasiatigut taasisoqassasoq

Ataatsimeersuarnissaq isiginnaarutikkut oqarasuaatikkullu ingerlanneqarnissaa illersorneqarsinnaanerusumik aaqqiinerussaaq Miki Jensen Siumut allattaanera taama allappoq.

Ataatsimeersuarnermi aallartitat Siumut siulittaasuannut maannamut qinigassanngortittunut taasisinnaapput, tassalu Vivian Motzfeldt imaluunniit Erik Jensen qinersinnaavaat, maannakkut siulittaasuusoq Kim Kielsen siulittaasunngornissaminut sassarniarnersoq suli ilisimaneqanngilaq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk