Siullerpaamik: Saattuat uumasut akitsorterussisarfimmukaallugit Danmarkimut timmisartuunneqartut

Timmisartuutileqatigiiffik Air Grenlandip oqaluttuarisaanerani aatsaat siullermeertumik saattuanik pisarineqaqqammersunik sulilu uumasunik 500 kiilunik Danmarkimi akitsorterussisarfimmukaanneqartussanik sisamanngormat assartuivoq.

Saattuat Nuummi aalisartunit pisarineqarput, taakkulu Hanstholmimi akitsorterussinermi tunineqarput.

Air Greenland Facebookimi quppernermini allappoq.

- Saattuat innarlernatik apuunneqassanersut pissangagisimavarput. Saattuat Hanstholmimi aalisakkanik akitsorterussisarfimmut apuunnerini 500 kiiluniittunit 13-niinnaat toqusimapput, tamannalu ilimagisatsinniit pitsaaneroqaaq, Cargo Sales Manager Søren Støvhase Nørsø oqarpoq.

Saattuat Nuummiit Kangerlussuaq aqqusaariarlugu Københavnimut assartorneranni suna tamarmi ajunngitsumik ingerlavoq.

Saattuat Københavnimut tikiunneqarmata nillataartumiitsinneqarput, akunnerillu marluk qaangiuttut tigusisussanut tunniunneqarlutik.

Air Greenlandillu suleqatigisaat aamma ilorrisimaarput. Aalisartunut avammut tuniniaarusuttunut siunnersortip, Mads Petersenip tamanna aalisarnerup oqaluttuarisaanerani alloriartoqarnerarpaa.

- Ullumi kaattaassivimmi saattuat uumasut tuniniarneqarmata minuttit tallimat ingerlaneranni tamarmik tunipput. Tuniniaanermi kiilumut 100-150 koruunilerlugit tunineqarput.

- Misiliineq siulleq ingerlalluarpoq naatsorsuutigaarpulli periutsit atorneqartut ilikkarluarneqarpata kiilumut akia suli qaffasinnerungaatsialissasoq, taanna oqarpoq.

Air Greenlandip aalisakkanik qalerualinnillu akitsorterussinissamut, neriniartarfinnullu annertunerusumik nassiussisalernissaq siunissamut anguniagaralugu allappaa.