Saattuat 10 milliardit tammartut
Alaskap avataa saattuarniarfiujunnaarpoq.
Alaskammi Ruslandillu akornanni imarpik Beringshavi 10 milliardit missaannik saattuakilleriapiloorpoq.
Ilisimatusarnerup nutaap tamanna takutikkaa ilisimatusartut atuagassiaanni Science-mi allaqqasoq, nutaarsiassaqartitsivik DR allappoq.
Taamaammat Alaskap oqartussaasui saattuarniaqqusiunnaarput.
Taamaattoqarneralu aarlerinarluinnartoq, Pinngortitaleriffimmi ilisimatusartuuneq AnnDorte Burmeister isumaqarpoq.
- Saattuarniat saattuarniarnermillu inuussutissarsiutillit eqqorneqaatigingaatsiassavaat, taanna KNR-imut.
Nunarput suli saattuaqarluartoq
Alaskap avataa saattuakilleriapilooraluartoq nunatta saattuakillinissaa ernummatigisariaqanngitsoq, AnnDorte Burmeister oqarpoq.
- Kitaa suli saattuaqarluarpoq. Saattuakinnerulertartorli misissuinitta ilaanni ersertarpoq, kisianni tassa suli saattuaqarluarpoq.
Taamaammat nunatta aamma saattuakilleriapiloornissaa ernummatigisariaqanngilaq.
- Nunatta aamma saattuakilleriapiloornissaanik massakkorpiaq ilimanartoqanngilaq. Taamaammat saattuakilleriapiloornissaa ernummatigisariaqanngilarput, taanna oqarpoq.
Taamaakkaluartoq AnnDorte Burmeisterip suleqataatalu Beringshavip saattuakilleriataapiloorneranik misissuinerit malinnaaffigeqqissaarpaat.
- Alaskap avataata saattuakilleriapiloornerata sumik peqquteqarneranik ilisimatusarnikkut misissuinerit tamatumanilu suut suliniutaanersut soorunami malinnaaffigeqqissaarpagut.
Imarpiup kissarnerulernera peqqutaasoq
Imarpiit kissarnerulernerat Beringshavip saattuakilleriarpiloorneranut peqqutaagunartoq, ilisimartusartut misissuisuusut oqarput.
Beringshavi 2018-imi 2019-imilu saattuaqarluarpoq, kissarnerulereerneranili saattuakilleriarpiloorluni.
Saattuap timaata inuussutissaminik suliarinninnera imarpiit kissarnerulerneranni sukkanerulersarmat kalorianik pisariaqartitsinera sisamariaatingajanngortartoq, ilisimatusartut oqarput. Taamaammat pisariaqartitaminnik nerisassaalatsillutik ikileriapiloorsimassasimapput.
Beringshavili ukialuit qaangiuppata saattuaqarluaqqilissangatikkini, ilisimatusartut misissisuusut allaatiginnittuat aamma USA-p imarpinnik ilisimatusarfiani silasiorfianilu, Noaami, uumasunik ilisimasalik Cody Szuwalski CNN-imut oqarpoq.
- Ilimagaarali saattuat imarpiup avannamut sikueriartornerani avannarparterumaartut, taanna oqarpoq.