Inuit aqqusinermi: Imminut toqunneq akiorniarlugu inuiaqatigiit akisussaaffeqarput
Meeqqanut inuusuttunullu Naalakkersuisoq Aqqaluaq B. Egede marlunngormat imminut toqunnissamut pinaveersaartitsinerup ullorititaanut atatillugu, innuttaasut akisussaaffimmik tiguseqataanissaannik kaammattuuteqarpoq.
Suliniummik tigussaasumik saqqummiussinngilaq. Innuttaasulli akisussaaffimmik tigusissasut oqaatigaa.
Imminut toqunneq akiorniarlugu tamatta akisussaaffeqarpugut.
Taamaammat KNR aqqusinermi naapitani Naalakkersuisup oqariartuutaa qanoq isumaqarfigineraat aperiartorpoq.
Naapitatta ilaat Kristine Thomsen, Aqqaluaq B. Egedep oqaasii isumaqatigai:
- Isumaqataavunga inuttaasugut tamatta akisussaaffimmik tigusisariaqartugut ikittunnguuvugut kalaallit nunaanni najugaqartuusugut tamatta immitsinnut ikioqatigiilluta tapersersortariaqaraluarpugut pingaarteqaara tamattaalluta akisussaaffik tigusinnaasuugutsigu, Kristine Thomsen taama oqarpoq.
Rakel Broberg aamma isumaqataavoq. Imminut toqunneq tamatta akisussaaffigigipput oqarpoq:
- Isumaqarpunga inuiaqatigiit tamatta akisussaaqataasugut tassunga oqariartuummut ah tassami taamatut. Akisussaaqatigiinneq tamatta ersarinnerujussuarmik pigisariaqaraluaratsigu aamma inuiaqatigiit ilutsinni tamatta. Rakel Broberg taama oqarpoq.
Steffen Knulstili isumaqataananilu akerliunngilaq, erseqqissarpaali inuit qanigisat kammalaatit ikiuiniarnerat kisimi naammanngittoq, inulerisut pingaaruteqartut:
- Kammappassuarnik annaasaqarnikuuvunga, taava soorlu ikiorniarsarisarnikooqaakka taava kisiat soorlu amerlanerit peerutiinnarnikuupput taava soorlu uanga nukinnik atueqqikkusukkunnaarnikuuvunga taamannak taamaammat proffessionelhjælp, Steffen Knulst taama oqarpoq.
Jaakuaraq Mortensen imminut toqunneq akiorniarlugu inuiaqatigiittut tamatta akisussaaffeqartugut oqaatigaa.
- Tassa taamtut uanga aamma isumaqarpunga peqataanerusariaqarput inuuneq iluamik ingerlassappat.
Tarnip pissussaanik ilimasallit saaffigisassaanersut aperineqarami ima akivoq:
- Tassa saaffigisassat tamakku saaffigineqarunik immaqa ajunnginnerpaapput. Jaakuaraq Mortensen taama oqarpoq.
