Ilisimatusartut naqissuserpaat: Kangiani natsiit immikkuullarissunik sananeqaateqarput

Qeqertarsuup Tunuani piniartunit taaneqartarput 'Kangiat' natsiit allat tamaani taaneqartarlutik 'Kitaajaqqat'.

Ilulissat eqqaanni Kangiani natsiit aamma angineroqaat. Ilutigitillugu natsernut allanut sanilliullugit amii allalersorneqarnermikkut qalipaatimikkullu allaanerullutik.

Tamatumunngalu pissutissaqarluarpoq.

Tassami Kangiani natsiit immikkuullarissunik sananeqaateqarput natsernit allanit allaanerusunik.

Tamanna Pinngortitaleriffimmi misissuinerup takutippaa.

Pinngortitaleriffmmit tusagassiorfinnut nalunaarummi allassimasut naapertorlugit puisit natsiinit allanit ukiuni 100.000-init sinneqartuni mattunneqarluinnarsimapput, taamaammallu immikkuullarissumik sananeeqaateqalersimallutik immikkuullarilluinnartumillu – allaanerusumillu - isikkoqalersimallutik.

Taama Pingortitaleriffimmi ilisimatusartuuneq Aqqalu Rosing-Asvid, misissuinermi nutaami ilisimatusaqataasoq, oqaluttuarpoq.

- Naak ikittunnguugaluarlutik allaanerussutertik attatiinnarsinnaasimavaat. Kisitsinerillu 2018-imi ingerlanneqartut malillugit Kangiani natsiit 3000-it missaannik amerlassuseqarput, Baffinip Kangerliumasartaani sumiiffimmullu tamaanga atasuni natsiit 1,2 millioninik amerlassuseqarnissaat naatsorsuutigineqarluni, tusagassiorfinnut nalunaarummi oqarpoq. 

Natsiinik qaammataasamit malinnaanerit takutippaat Kangia qimanngisaannangajakkat. Puisit 24-usunit ataasiinnaq kangerluk sivisunerusumik qimaqqasimavaa. Assi © : Grønlands Naturinstitut

Kangianiiginnartarput

Puisinik qaammataasamit malinnaanerup aamma takutippaa Kangia qimanngisaannangajaqqaat. Puisinit qaammataasamit malinnaassuteqartuni 24-usunit ataasiinnaap Kangia sivisunerusumik qimaqqasimavaa.

Natsiit issittoq tamakkerlugu siuaruarsimasuupput. Nunanilu sumiiffinni immikkoorluinnartuni natseqatigiiaat assigiinngitsut tallimaapput. Natseqatigiiaalli amerlanerpaartaat siaruarsimanerpaallu tassaapput issittup natsii, millionilikkaajullutik.

Natsiit tamakkua siaruarsimaffimminni akulerussimasarput misissuinerillu malillugit timaanni ilalisaataat assigiiaartorujussuullutik. Kangiani natsiit taamak immikkoortiginerat taamaammat uissuumminarpoq.

- Natsiit Kangianeersut natsernik allaneersunut akuliuttaraluarlutik immikkoorutertik attattuartarpaat, taamaattumillu ilaminnik allaanerulluinnartumik puisiussuseqarlutik, puisillu akornganni taamaattut qaqutigoortorujussuupput, ilisimatusartuuneq Aqqalu Rosing-Asvid oqaluttuarpoq.