Ilisimatuut Qaqortup kangerluani eqaluit ingerlaarfiat misissuiffigilerpaat
Ilisimatuut Norgemeersut, Tuluit nunaaneersut Bulgariameersullu ulluni makkunani Qaqortumiipput. Silallu pissusiata allanngoriartornera ilisimasaqarfigillualerumallugu eqaluit meqqinik ulluni qulini ikkussuiffiginiarpaat.
Norgemi teknikkimut pinngortitalerinermullu ilisimatusarfimmi professori Jan Grimsrud Davidsen taama oqarpoq.
-Pinngortitap siunissami qanoq innissaanik paasinninniarneq ikkussortakkatut ippoq. Silap pissusiata allanngoriartornera eqalunnut qanoq sunniuteqassanersoq sapinngisarput tamaat paasisassarsiorfigissavarput, taama oqarpoq.
Eqaluk pisarineqareernermi kingorna nerineqarani mianersortumik suliarineqassasoq Jan Grimsrud Davidsen nassuiavoq.
-Aalisagaq pisarigutsigu ilisimajunnaarnartumik kapissavarput taava malugisaqassanngilaq. Soorlu napparsimavimmi inuit taamak aamma pineqartartut. Eqaluk 1,5 centimeterisut takitigisumik pilassavarput meqqimillu ikkussivigalugu.
Nipinik tigooqqaaviit nillujuitsutut angitigisut kangerlummi inississorneqarsimapput. Meqqi eqalummiileraangami paasissutissanik nassiussuilertarpoq. Ilisimatuullu eqaluk ulluni 400-uni malittarisinnaalissavaat.
-Eqaluit 80-it pisarigutsigit meqqinik paasissutissanik nassiussuisunik ikkussiffigissavagut. Taamaalilluta takusinnaalissavarput aalisagaq tallimanngornermi kangerlummi uaniissimasoq marlunngornermilu kangerluup aappaaniilersimasoq. Immallu kiassusaa qassimiissimanersoq takusinnaalissavarput, taanna oqarpoq.
Silap pissusiata allanngoriartornera eqalukkut oqaluttuarineqarsinnaavoq
Misissuinerup siunertaraa eqaluit immap kissatsikkiartornerani qanoq eqqugaassanersut paasiniassallugu. Eqaluk aalisagaavoq aalisakkaaniit allaniit malussarinneq taamaattumik immap kissassusaata allanngornera sukkanerusumik malugisarpaa. Jan Grimsrud Davidsen oqaluttuarpoq
-Eqaluk aalisagaavoq imermi tarajoqanngitsumi nunarsuup avannani uumasuusoq. Kalaallit Nunaata, Svalbardip Ruslandillu avannaanni. Silap pissusiata allanngoriartornera avannaani esarinneruvoq, taamaattumillu eqaluk eqqugaanerpaat ilagissavaat, taanna oqarpoq.
Eqaluilli ingerlaarfiinik nalunaarsuinikkut silap kianneruleriartorneratigut eqaluit allani uumaffeqalernerat takutinneqartoq ajuusaarutigissanngilarput. Aammami siunissami eqaloqaannarnissaa taamaaliornikkut qulakkiissavarput.
Tassani eqaluup atugai paasilluarutsigit, siunissami eqaluttassaqarsinnaanissaq aamma qulakkeersinnaaqooqaarput, Jan Grimsrud Davidsen nassuiaavoq.
-Paasisat katersukkagut ilissi Kalaallit Nunaanni innuususi eqaluit ilissinnut pitsaanrpaamik aqukkusukkussigit atorluarsinaavasi. Tasssalu Meeqqassi ernuttassilu siunissami eqaluttugassaqartuarnissaat qulakkeerneqassappat piffissani aalajangersimasuni killilimmik eqalunniartoqarsinnaalissanersoq nalilerluarsinnaalissavarsi.
