Inatsisartut piniartut aningaasatigut ikiorserneqartalernissaannik siunnersuut tapersersoraat

Inuussutissarsiutigalugu aalisartut piniartullu silap pissusiata allanngoriartorneranik pissuteqartumik ajunaarnersuarmut assingusumik ajornartoornermi aningaasatigut ikiorserneqartalernissaat pillugu inatsisissatut siunnersuut Inatsisartut ippassaq marlunngornermi siullermeerpaat.

Tassa aningaasanut inatsit aalisartunut piniartunullu silap pissusiata allanngoriartorneranik eqqugaasunut aningaasatigut ikiorsiinissamut taamaallaat atugassamik immikkut kontoqalissasoq siunnersuutigineqarpoq.

Inatsisissatut siunnersuut Inatsisartut ippassaq marlunngornermi siullermeermassuk partiit tamarmik tapersersorpaat, illuatungiliuttulli tamanna aningaasatigut qanoq naleqassanersoq akissutissarseqqaarusuppaat. Inatsisartut siunnersuut taanna maajip 30-ani aappassaaneertinnagu aningaasaqarnermut akileraartarnermullu ataatsimiititaliamut suliassanngortippaat.

- Nunatsinni nunarsuatsinnilumi allami silap allanngornera malugisimavarput. Annertuumilli aqqusaagaasut tassaapput sila avatangiiseralugu inuussutissarsiortut, ataqqinartut piniartut aalisartullu. Taakkualu ikiorserneqartarnissamik pisariaqartitsipput, IA-meersoq Agathe Fontain inatsisissasut siunnersuutini saqqummiummagu oqarpoq.

Tapersersoraluarlugu nangaasut

Inatsisissatut siunnersuut tapersersoraluarlugu aningaasatigut qanoq naleqassanersoq ajunaarnersuartullu qaqugukkut naliliisoqartassanersoq Inatsisartuni partiit arlallit akissutissutissarseqqaarusupput.

 - Apeqqutit tamakku eqqarsaatigalugit ataatsimiititaliamut ingerlatitseqqippugut, taakkua qulaajarneqarnissaat pingaaruteqarmat, Demokraatit siulittaasuat Jens Frederik Nielsen KNR-ip siunnersuummik siullermeerinnereernermi oqarpoq.

Naalakkersuisup Kalistat Lundip inatsisissatut siunnersuut aamma tapersersorpaa, inatsimmik allanngunissaq sulissutigineqalereermat inatsimmik allanngunissamik siunnersuuteqarput, siunnersuutaallu Inatsisartut aappaagu upernaakkut ataatsimiinneranni saqqummiunneqassaaq. Inatsimmik allannguinissamik siunnersuutaat sunik imaqarpiassanersoq Inatsisartut ataatsimiinneranni itisilerneqanngilaq.

- Nalimmassaajuartarnissaq pisariaqarpoq. Ingammik silap ukiuni kingullerni allanngoriartorujussuarnera sunniisartoq kikkut tamatta nalunngilarput. Allannguutissamik siunnersuuteqarsimavugut. Ilaatigut una pineqarami, ilumut silap allaanngoriartorneranit pisuua? Imaaluunniit siornatigut aamma pisarsimava, silap allanngoriartornera tusarsaavallaanngikkallarmat?

 Naalakkersuisut isummernerat nuannaarutigigaluarlugu allannguutissatut siunnersuutaat suliarilertorneqassasoq, Agathe Fontain neriuppoq.

- Qujanassaaq. Ilaqutariit taamatut nalaataqartartut ikiorserneqarnissaat pisariaqarluinnartoq isumaqarpunga, taanna oqarpoq.

Piniartut ikiorserneqartalissallutik neriuttut

Qaanaami inuussutissarsiutigalugu piniartoq, Jens Danielsen, siunnersuutip taassuma akuerineqarnissaanik neriuuteqartunut ilaavoq.

Taanna silap pissusiata allanngoriartorneranik pissuteqartumik siorna ukiorluunerani ajornartoortunut aamma ilaavoq.

- Neriuttunga taamatut pilersitsisoqassasoq. Ajornartoornermi piniartutut aalisartutut inuussutissarsiutillit ataasiakkaatut qinnuteqarfigisinnaasaannik aningaasaateqarfimmik pilersitsisoqarpat assorsuaq torrallatamik pilersitsisoqassasoq isumaliorpunga, Jens Danielsen oqarpoq.

Kullorsuarmi aalisartut piniartullu peqatigiiffiata siulittaasuata Timotheus Petersenip oqarnera naapertorlugu ilaqutariit arlallit ukiorluummat inuussutissaqarniarnikkut ajornartoornerminni assut kipiluttunartorsiorput, aalisarsinnaanngikkallarnerminnimi allamik suliffissarsisinnaanngillat. 

- Tamarsuatta sulisartunngornissarput ilimananngilaq, misilittagaqarfiginngilarput sulisartuuneq. Kisiannilu qangalili ilitsoqqussat aallaavigalugit aalisarneq piniarnerlu annertuumik ingerlanneqarsimasoq aamma anersaaqarfiginera taanna imaaliallaannaq qimanneqarsinnaanngilaq, Timotheus Petersen oqarpoq

Inatsisissatut siunnersuut Inatsisartuni maajip 30-ani aappassaaneerneqassaaq.