Juulimi kiassuaqattaarneranut silap pissusiata allanngoriartornera pissutaangaatsiartoq
Inuit pilersitaannik kinguneqartumik Amerika Avannarlermi, Europami Kinamilu juulip qaammataani kiarujussuaqattaarpoq.
Immikkut ilisimasallit World Weather Attributionimeersut misissuereerlutik marlunngornermi taama inerniliipput.
- Silap pissusiata allanngoriartornera pinngitsoortinneqarsinnaasimasuuppat iliuuseqarfigineqarfigineqarsimasuuppalluunniit Europami Amerika Avannarlermilu taama kiatsigilersimanavianngikkaluarpoq, Izidine Pinto, Hollandimi silasiortuneersoq oqarpoq.
World Weather Attribution ilisimatuussutsikkut suleqatigiinneruvoq, silap pissusiata allanngoriartornerata silapiluttarneranut suniuteqaataat tassani misissorneqartarlutik.
2,5 gradinik kiannerusoq
Takornarianit ornigineqarluartartumi grækerit qeqertaataanni Rhodosimit takornariat tuusintilikkaat orpippassuit ikuallammata sapaatip akunnerata naanerani qimagussorneqartariaqarsimapput.
Qaammatillu aallartinneraniilli sila imaannaanngitsoq orpippassuarnik ikuallatsitsivoq, imermik amigaateqartitsillunilu kiammit inuuserlernermik nunarsuaq tamakkerlugu nassataqartitsivoq. Kinami USA-mi Europallu kujataani aatsaat taama kiatsigisimavoq.
Aamma atuaruk Naatsorsuutiginngisamik pisoqassagaluarpat periataarniarpugut
Misissuineq naapertorlugu gassit silaannarmik kissakkiartortitsisartut silaannarmi annertusiartornerat Europami kiassuarnermi 2,5 gradinik kiannerutitsisimavoq.
USA-mi kiassuarnerup nalaani 2 gradinik kiannerusimasoq Kinami 1 gradimik kiannerusimavoq.
Ingatsikkaluttuinnartoq
Kiarujussartarnera inunnut kinguneqarnerlutsitsiinnarani assersuutigalugu naatitanik karrinillu pilersuinermut kinguneqarnerlutsitsivoq, soorlu aamma uumasuutinut kinguneqarnerlutsitsisoq.
USA-mi ingammik majsinik soyanillu, Mexicomiut nersutaataannut, Europallu kujataani oliveninut Kinamilu annoraassiassanut sunniuteqangaatsiarsimavoq.
Aamma atuaruk Qallunaat 100-t missaanniittut Rhodosimi timersortarfinni centerinilu unnuisut
Gassinik silaannarmik kissakkiartortitsisartunik aniatitsineq annikillisinneqanngippat taamatut kiarujussuartarnera siunissami nalinginnaasunngoriartuinnassasoq, immikkut ilisimasallit misissuereerlutik inerniliuppaat.
Suliffissuaqalernerup siornatigut kiattarneranut naleqqiullugu nunarsuaq ataatsimut isigalugu gradit marluk sinnerlugit kiannerulerpat ukiut marluk tallimallu ingerlaneranni sivisuumik kiarujussuartarnissaa ilimagineqartariaqartoq immikkut ilisimasallit World Weather Attributionimeersut oqaatigaat.
- Pisut takusimasavut ullumikkut silap pissusiani nalinginnaasuunngillat, Friederike Otto, Londonimi Grantham Institutimi silap pissusiata allanngoriartorneranik ilisimatusartoq taama oqarpoq.
- Ikummatissanik atuinerput ingerlatiinnarutsigu pisut ingasattut taamaattut amerlatsikkaluttuinnassapput.
