Qallunaat 100-t missaanniittut Rhodosimi timersortarfinni centerinilu unnuisut

Takornarianit ornigineqarluartartumi grækerit qeqertaataanni, Rhodosimi, orpippassuit ikuallapput. Qallunaallu 100-t missaanniittut ataasinngornerup unnuaani ataatsimeersuartarfinni timersortarfinnilu unnuisinneqarput.

Henrik Spechtip, danskit inuussutissarsiuteqartut kattuffianni Rejsearrangører-imi pisortaasup, missiliuussinera malillugu taama isikkoqarpoq.

Takornarianit ornigineqarluartartumi grækerit qeqertaataanni orpippassuit ikuallannerat inuit 19.000-t missaanniittunik qimagussuititsisimavoq, nutaarsiassaqartitsivik Reuters taama allappoq.

Qallunaat katillugit 10.000-ngajaat tassani qeqertamiipput, pisortaq taama naliliivoq. Taassuma oqarnera naapertorlugu taakkunani 3-400-t ikuallannernit sunnerneqarsimapput.

Taakkunannga 200-t missaanniittut akunnittarfinnut inissinneqarsimasut 50-illu angerlamut timmisartuunneqarsimasut naatsorsuutigaa.

5 procentii ikuallannernit sunnerneqarsimasut

Inuit 100-nut timersortarfinni centerinilu unnuisimasunut aaqqiissutissaqartoqarnissaa sulissutigineqarpoq, taanna nassuiaavoq.

- Inissinneqarnissaannut periarfissat suliarineqapallapput, ingerlatseqatigiiffiillu ilaasa Rhodosimut timmisartuussinissaata taamaatiinnarneqarnerini takornariat ilaannut akunnittarfinni inissaqartitsilerput, taanna oqarpoq.

Qallunaat Nunanut allanut ministereqarfiat naapertorlugu qallunaat 10.000-t 5 procentii ikuallannernit sunnerneqarsimapput.

Naak inunnik qimagussuisoqaraluartoq qallunaat ilaasa angalanertik nangikkusukkaat, pisortaq Henrik Specht oqarpoq.

- Rhodosip kujataani ikuallannerit qimakkamikkit feeriarnertik nangikkusuppaat, taanna oqarpoq.

Mittarfiup natiani sinissimasut

Takornariat aallarsinnaalernissartik tungaanut utaqqinerminni aallartarfiup natiani sinittut, Rhodosip mittarfianeersut assit tamanna takutippaat.

Rhodosimi borgmesterip tulliata, Konstantinos Tarasliasip, BBC naapertorlugu ataasinngormat ullukkut oqaatigaa ikuallannerit suli ”nakkutigineqarsinnaalinngitsut”.

Qatserisartut qamisaanermut ikiuukkiartorlutik qeqertamut tikissimasut, taanna oqarpoq.

Tyrkiamiit, Kroatiamiit Egyptenimiillu timmisartut qatserisartut aamma tikissimapput.

Qeqertami Korfumi ataasinngormat aamma ikullattoqarneranik inunnillu tuusintilikkaanik qimagussuisoqarsimanera nalunaarutigineqarpoq. Borgmesterip tulliata Nordkorfu Theofanis Skembrisip BBC-mut nalunaarutigisimavaa ullumi ataasinngornermi ullup qeqqata siorna ikuallannerit amerlanerpaartai nakkutigineqalersinnaasimasut. Ilanngullugulu oqaatigaa ”ikuallannerit qaangiutangajalersut”.

Europap kujataani kiassiungaatsiarput.

Grækerit Nunanni pinngortitaq ikuallakulasarpoq, silap pissusiatali allanngoriartornerata malitsigisaanik Europap kujataani annertuumik kiassuaqartarpoq.