Nuunu Brandt ikuallattumi Korfumiittoq: Naatsorsuutiginngisamik pisoqassagaluarpat periataarniarpugut
Rhodosimi nuna ikuallattorsuuvoq, taamatuttaaq qeqertami Korfumi nuna ikuallappoq.
Nuunu Brandtikkut Korfumi ikuallanneq ippassaq malugilerpaat, qilammi tamarmi aappaluttuinnaviusoq takulerpaat.
- Ippassaq unnukkut aqqarngup kingorna takulerparput qilak aappaluttuinnaasoq. Nammineq susoqarnera paasiniarparput paasivarpullu nuna ikuallattoq, taanna KNR-mut oqaluttuarpoq.
Taanna angutaatinilu qeqertami Grækenlandimiittumi aasarsiorput, ikuallattumiillu 30 kilometerinik ungasitsigisumiillutik.
- Aatsaaginnaq takuagut timmisartut imaanut imermik aalleqattaartut, Nuunu oqaluttuarpoq.
- Annilaangalaarpugut, susoqarneralu pillugu misissuikannerluta, soorlu internetsikkut nutaarsiassanik malinnaavugut, kisiannili aappaatigut suut tamarmik nalinginnaasutut ingerlapput, illoqarfinnimi aalajangersimasuinnarni taamaallaat inunnik qimagussuisoqarpoq.
Ataatsikkut sisamat ikuallapput
Nuunu Brandt inunnik qimagussuiffiusumiinngilaq.
Rhodosimili ikuallattoqarnera sakkortuneruvoq tamaanimi takornariat sapaatip akunnerata naanerata ingerlanerinnaani qimagussorneqarput. Korfumili avannaa tungaaniittut kisimik qimagussorneqarput.
Korfumi nunami ikuallaffiusut amerlanerit maanna aqunneqarsinnaalersut ullumi nalunaarutigineqarpoq, taama Korfup avannaani borgmesteriusoq Theofanis Skembris BBC-mut oqarsimasoq nutaarsiassanik siammarteriviup Ritzauip nalunaarutigaa.
- Nunat ikuallaffiusut ataatsikkullu ikuallalersut sisamaapput, taanna taama issuarneqarpoq.
-Misissuinerit utaqqeqqaartariaqarsimavagut, qatserisartoqarfiulli pisortatigoortuunngitsumik oqarnera naapertorlugu taakku ilai piaaraluni ikuallatitsinerupput. Ikuallannerimmi sumiiffinni assigiinngitsuni sisamaneersut ataatsikkoorsinnaanngillat, taanna oqarpoq.
Annilaangallutalu annilaanganngilagut
Nuunu Brandtikkulli uippallinngillat.
- Pinartumik pisoqariataassagaluarput qanoq iliorsinnaanerput eqqarsaatigillattaarparput, annilaangalertarlutalu annilaangajunnaartarpugut, ajunngilagulli, pinartumilli pisoqariataarnissaanut piareersakannerpugut, taanna oqarpoq.
Nuunu Brandtip aappani angalaqatigaa, marluullutillu Nuummi najugaqarput.
