Siumumi siulittaasumut taasineq: Siulittaasunngorniunneq uani malinnaaffigiuk

Ilanngutassiaq nalunaaqutaq 15:54 nutarterneqarpoq.

Siumut Nuummi Hotel Hans Egedemi immikkut ittumik ullumi ataatsimeersuarpoq – siulittaasussamillu taasisoqassaaq.

Siumup Inatsisartunut qinersinermi oqaluttuarisaanermi aatsaat taama taaguunnikitsigineqarnerata kingunerisaanik Erik Jensen siulittaasutut tunuarmat partiip siunissaa qanoq ittuunissaa eqqarsaatigineqarpoq.

Siumup immikkoortortaqarfiisa arlallit soorlu Uummannami, Upernavimmi Sisimiunilu immikkoortortaqarfiit Aleqa Hammond siulittaasussatut piukkuppaat.

Siumup Inuusuttaasa partiip ataatsimoorfiunnginnera, avissaartuuffiunerunera inuusuttunullu tusarnaarnissaminnik puiuinera pillugu ataatsimeersuarnerup aallartinnerani isornartorsiorpaa. Siulittaasuni nikittoqarnissaa piumasaraat Ineqi Kielsenillu siulittaasussatut innersuullugu.

Kim Kielsenip Siumup Inuusuttuai oqaaseqarnermini taperserpai.

Vivian Motzfeldt siulittaasuugallartoq partiimi siulittaasuuginnarniarsarivoq.

Sapaatiuppamut kinguartinneqartoq

Nuup putserpoq, taamaammat peqataasussat tamarmik tikinniarnerat ajornakusoorsimavoq.

Tamannalu pissutigalugu siulittaasussamik siulersuisunullu ilaasortassanik taasineq aqagu sapaammut kinguartinneqassasoq aalajangerneqarpoq.

Partilli ullup sinneranut pilersaarut malillugu ataatsimiissaaq.

Eqqissiviilliortoqarnera pissutigalugu nutaamik ileqqoreqqusaqalersoq

Kommunimut qinersisoqarnerata kingorna Kommune Qeqertalimmi pisoqaaluppoq.

Aqqalu Reimer (S) borgmesterinngortussatut inissillugu Siumup Naleqqallu akornanni suleqatigiinnissamut isumaqatigiittoqarpoq. Taannali tunuarluni atuuffik Franz Lundbladimut (S) tunniuppaa. Lundbladillu atuuffik Reimerimut tunniuteqqillugu.

Siumut taamaalilluni naggataani borgmesteriuteqartussaajunnaarpoq, Simigaq Heilmannilu borgmesterinngortussanngorluni.

Kommunimut qinersisoqarnerata kignorna taaguunneqarnerpaaq isumaqatigiinniarnernik ingerlatsisuusassasoq, Siumumi immikkut ataatsimeersuarnermi maanna akuerineqarpoq.

Ilaasortaajunnaarsitsineq

Qasigiannguani 2023-mi nuna tamakkerlugu ataatsimeersuarnermi siulittaasunngorniuttoqarnerani peqquserluuteqartoqarpoq.

Siumup Nuummi immikkoortortaqarfiani siulittaasup partiimi aqutsisut allat peqatigalugit ilaasortat amerlassusaat peqquserluutigai. Amerlanerusunik aallartitaqarsinnaaniarlutik taama iliuuseqarput.

Tamanna Siumumi ataatsimiinnerup kingorna misissuinerup takutippaa.

Taamaammat ileqqoreqqusaasut allanngortinneqassanersut ullumikkut oqaluuserineqarput, taamaaliornikkut siulersuisuunerit partiimi ilaasortanik iluminni ileqqoreqqusaasunik partiillu inatsisaanik unioqqutitsisunik ilaasortaajunnaarsitsisinnaalissallutik. Ilaasortaajunnaarsitsinissaq partiip immikkoortortaqarfiisa ullumikkut aalajangertarpaat.

- Ileqqoreqqusaasunik malinninngitsoqaruni aamma partiimut innarliisimagunik imaluunniit Siumumut akerliusumik iliuuseqarsimagunik taava siulersuisuunerit erngertumik ilaasortaajunnaarsitsisinnaapput, Vivian Motzfeldt oqarpoq.

Ineqi Kielsen apeqqummut allatut isumaqarpoq. Taassuma ileqqoreqqusaq taama ittoq tamat oqartussaaqataanerisa tunngaviinut unioqqutitsinerussasoraa. Taanna inuit tassa qinersisartut taaguutaat ataqqineqassasut isumaqarpoq. 

Vivian Motzfeldtip tamanna isumaqatigaa, malittarisassalli ataqqineqarnissaat ilanngullugu oqaatigalugu.

Ileqqoreqqusanik allanngortitsinissamut tunngasoq tulliani ataatsimeersuarnissamut kinguartinneqarpoq.