Siulersuisuni ilaasortat allanik atuuffeqarneri eqqarsaatigineqartariaqarput
- Atuuffeqarnerata saniatigut allamik atorfeqarnera ajorinngilarput, tunngaviatigulli ajornakusoortuusoq isumaqarpugut. Tassami inuit assigiit assigiinngitsunik marlunnik matoqqasumik isumaqatiginninniartartussaassammata, TIG-mi, Transparency International Greenlandimi, siulittaasoq Anita Hoffer KNR-mut allappoq.
Royal Arctic Linemi siulersuisuni siulittaasup, Kuno Fenckerip, umiarsuaatileqatigiiffimmi ataatsimeersuarnermi siulittaasutut qinigaaqqinneranut atatillugu Transparency Greenland isornartorsiuivoq.
Aamma atuaruk Naalakkersuisut siulersuisunut ilaasortanik toqqaanertik itisilerusunngilaat
Kuno Fencker namminersortumi Aluu Airlinesimi, silaannakkut kiffartuussinissamik isumaqatigiissusiortartussami, RAL-imi atuuffimi saniatigut tuniniaanermi pisortaavoq. Kalaallit Nunaanni timmisartuussinikkut angallassinermi kiffartuussinissamik isumaqatigiissuteqarniarlutik, Aluu Airlinesip siusinnerusukkut nalunaarutiginikuuaa.
Nunatsinnilu timmisartuussisalernissaa 2015-imi akuerineqarpoq.
Suliffeqarfiillu assigiinngitsut marluk sinnerlugit Namminersorlutik Oqartussanut kiffartuussinissamik isumaqatigiissusiortarsinnaanera Transparency International Greenlandip akunnattoqartippaa.
- Kiffartuussinissamik isumaqatigiissusiortoqartillugu nammineq soqutigisat akuliunneqartoorsinnaapput, tamannalu pinaveersaartinneqartariaqarpoq, Anita Hoffer erseqqissaavoq.
Aamma atuaruk Siulersuisut toqqarneqarnerannut tunngavilersuutit Transparencymit paaserusunneqarput
Royal Arctic Line Aluu Airlinesilu imminnut unammillertuunngimmata Kuno Fenckerip taakkunani atuuffeqarnini isornartoqartinngilaa.
- Umiarsuaatileqatigiiffimmi allami RAL-ip unammillertigisinnaasaanut pisortaagaluaruma tamanna ajornartorsiutaasoq takusinnaasimassagaluarpara. Taamaattoqanngilarli, Kuno Fencker KNR-imut oqarpoq.
Matumanilu Anita Hoffer isumaqataavoq, taamaattorli;
- Aap, taakku immikkooruteqarput. Inunnilli aalajangersimasunik assigiinngitsunik marlunnik isumaqatigiissusiuleruni nalorninartorsiorfiussaaq, sunnerneqanngitsoornaviannginnamimi.