Sisoraaserluni ooqattaasarneq: Ukaleq pikkorinnernut angummatilerpoq

Corona pissutigalugu Norges Cupimi peqataasinnaasut 40-innaapput.

Maanna ukiuunerani Norges Cupimi siullerpaamik unammisoqarmat takisuumut naatsumullu unammisoqarpoq sapaatip akunnerata naanerani kingullermi Geilomi unammisoqarmat. Unamminerni tamani Ukaleq Slettemark suli inuusuttuaqqani unammisartuugaluarluni angusarissaarpoq. Norgemi U-23-ni unammisartuni Lillehammerimi sungiusaqatigisakkamini takisuumut unamminermi angusarissaarnersaavoq.

Takisuumut unamminermi Ukaleq normu 9-uvoq pallungalluni seqqornerni marluusuni ataasiaannarluni uniorluni nikorfallunilu seqqornerni uniorani. Norgemi U-23-ni nunanut allanut unammisartut angusarissaarnersaat normu 13-nngorpoq.

Naatsumut aamma unammisoqarpoq, tassanilu Ukaleq Slettemark normu 12-tut inissippoq nikorfalluni seqqornermi uniorani pallungallunili ataasiarluni uniorluni. Ukiunik marlunnik angajulleq Juni Arnekleiv uniorani seqqoqattaarami naatsumut ajugaavoq – Ukaleq Slettemarkimiit taamaallaat minutsi ataaseq sekundillu 21-it sukkanerulluni.

Nukittunerussaaq

- Unammeqqinnerput assut nuannaarutigivara. Angusakka aamma naammagisimaarpakka. Kisianni qasujaassutsikkut suli inissiffigerusatara angunngilara. Neriuppunga piaartumik tamanna angusinnaassallugu, Ukaleq Slettemark KNR-mut oqarpoq.

Ukiuunerani unammeqqaarnermi aalajangersimasunik anguniagaqanngilaq angusanili ingerlariaqqinnermi najoqqutarissamaarlugit.

- Unammeqqaarneq pingaaruteqarpoq sungiusarnerma naleqqussarnissaanut tamanna atorsinnaagakku, Ukaleq Slettemark qasujaassutsikkut unamminissanut tullernut nukittorsarniartoq oqarpoq.

Tullianik unamminissaa tassaavoq Hochfilzenimi World Cupeqarnissaa, tassanilu peqataanissamut nunani tamalaani kattuffimmit immikkut akuerisaavoq upernaaq angusarissaarnini najoqqutaralugit.

- Unamminermi tassani angusarissaarniarneq siunertaanngilaq, tassanili unammisat qanoq kakkatsiginerat maluginiassavara taamaasillunga tullianik World Cupeqataanissanut toqqissimaneruniassagama, Ukaleq Slettemark oqarpoq.

Hochfilzenimi World Cup decemberip 11-at aamma 13-at pissaaq.