Sisoraaserluni ooqattaasarneq: Ukaleq OL-mut ummarissaarpoq
Sisorarnermi siuariartorluartoq 19-nik ukiulik Ukaleq Slettemark Østrigimi sisorartarfissuarmiit Hochfilzenimiit sapaammi Norgemut tikinnermini ingerlaannartumik mattusimagallalerpoq.
Tassani nukarlersaalluni nunarsuarmi kakkannerpaat unammersuarneranni World Cupimi peqataavoq. Tallimanngorneq decemberip aqqarnat peqataasunit 106-nit normu 83-nngorpoq. Tamanna sapaatip akunneranik siusinnerusukkut World Cupimi peqataaqqaarneraniit pitsanngoriarneruvoq tassani normu 96-nngorami.
AAMMA ATUARUK Sisoraaserluni ooqattaasarneq: Ukaleq 22-mi OL-mut alloriarpoq
Ukaleq Slettemarkillu malugilluarpaa pikkorissunut unammilluni.
- Aallaqqaammut sakkortuvoq qanoq kingulliutiginera takullugu, naak nalunngereeraluarluarlugu tamanna ilimagisariaqartoq, Ukaleq Slettemark oqarpoq.
Kina-mi OL
Ukaleq Slettemarkilu decembarip ulluisa aqqarnani World Cupimi 116 pointinnappoq. Pointilersueriaatsimi tassani pointikinnissaq anguniarneqartarpoq. Ukaleq Slettemarkillu pointinnattaavo World Cupimi peqataaqqinnissamut ammaassipput.
- Maanna paasivara sumi inissisimanerlunga qanorlu pitsanngoriartitassaqartiginerlunga. Aamma World Cupimi periutsit paasisaqarfigaakka tullianik tassani unammeqataanissani toqqissisimassutigisinnaasannik, Ukaleq Slettemark oqarpoq.
AAMMA ATUARUK Sisoraaserluni ooqattaasarneq: Ukaleq pikkorinnernut angummatilerpoq
Angorusulluinnagaa tassaavoq 2022-mi ukiuunerani Kinami OL-qarnissaanut anngunnissaq. 2019-milu OL-mut annguteriarnissamut aningaasaliiffigineqarpoq. Hochfilzenimilu World Cupimi angusaasa takutippaat illerngit pitsaasut atuallassimagai.
- Angusat taakku naammapput nunani tamalaani Danmarkimilu OL-mut piumasaqaatit angunissaannut, taamaattumik OL-mut annguppoq, sisoraaserlutik ooqattaasartartut kattuffiat Greenland Biathlon nalunaarpoq.
Ukaleq Slettemarkili World Cupimi peqataassanngikkallarpoq World Cupimit appasinnerusoq IBU Cup peqataaffigeqqaassagaluamiuk. Ukiumi nutaami aamma inuusuttuaqqani VM-qataassamaarpoq.
