Sisoraaserluni ooqattaasarneq: Ukaleq 22-mi OL-mut alloriarpoq
World Cupimi peqataasunit 109-nit normu 96-nngorneq tusaannarlugu immaqa naammaannarpoq.
Piffissalli atorneqartut inissitsiternerillu misissoqqissaareerneranni tamanna naleqartorujussuusoq paasinarsivoq.
Tassami OL-mut anngunnissamut qallunaat piumasaqaataat Ukaleq Slettemarkip siullermeerluni anguaa tallimanngormat sisoraaserluni ooqattaasarnermi World Cupimi angusani najoqqutaralugu.
Dansk Skiforbundimit tamanna KNR-mut aamma uppernarsarneqarpoq. Taamaattorli OL-mut peqataanissaq suli qulakkeerneqanngilaq.
Piumasaqaataavormi OL-mut anngunnissamut piumasaqaat ukiortaap kingorna Ukaleq Slettemarkip angoqqissagaa. Taassuma qaavatigut nunani tamalaani kattuffik aamma piumasaqaateqarpoq.
Dansk Skiforbund KNR-mut ilisimatitsivoq sisoraaserluni ooqattaasarnermi nunani tamalaani kattuffiup IBUp piumasarigaa nunatut OL-mi inissamik pissarsiniarnissaq. Tamanna anguteqassappat nunat nunarsuarmi kakkaannerpaat 20-t ataallugit inissisimasut akornanni Ukaleq pikkorinnerit aqqaneq marluk akornanniittariaqarpoq.
OL nuannersuusariaqarpoq
Ukaleq Slettemark anguniakkamik ilungersuuteqarnissamut piareersimavoq – tassa OL-mut anngukkusukkami.
- Assut iluarpoq maannakkut killiffiga OL-mut anngunnissamut naammattoq. Kisianni suli inerisarusuppunga OL-mut anngunnissaq piviusunngussappat misigisaq nuannersuuniassammat, Ukaleq Slettemark KNR-mut oqarpoq.
19-niinnarnik ukioqarluni World Cupimi peqataanera ukioqataanut sanilliullugu siusippoq. Naliginnaasuuvormi sisoraaserlutik ooqattaasartartut 22-nik 23-nik ukioqarlutik World Cupimi aatsaat peqataasalersarput. Nunarsuarmi kakkannerpaanut unammineq qamuuna sakkortusinnaavoq. Imaluunniit:
- Tamanna eqqarsaatigivallaarnaversaarpara IBU-Cupitut (nunarsuarmi kakkannerit tullii, aaqq.). Kisianni tassa IBU Cupimiit World Cupimut assigiinngissut annertoqaaq, Ukaleq Slettemark oqarpoq.
- Unamminerup naammassinera nuannaarutigaara tullianik unammeqataanissanut sanilliussassaqalerama, Ukaleq Slettemark naggasiivoq.
Tullianik World Cupimi unamminissaa tallimanngorneq decemberip 18-at pissaaq tamannalu Hochfilzenimi pissaaq.