Sisimiuni qaqorsaammik nalaatsornikkut ajutoorneq: Pinerluttuliortoqarsimaneranut takussutissaqanngilaq

Sisimiuni ulluunerani paaqqutarinniffimmi Uiami dunkimit imermik imaqartumit imeratik dunkimit qaqorsaatitalimmik imigaqarnermik kingorna nakorsiartarfiliaanneqarput.

Pisumili pinerluttoqarsimanissaanut takussutissaqanngitsoq, Kalaallit Nunaanni Politiit pigaartut pisortaat, Mark Larsen pingasunngornermi ullaap tungaani paasissutissiivoq.

- Pisussaanngitsumimmi pisoqarpoq, kisianni tamanna suliffimmi ingerlatseriaatsimi kukkunerugunarpoq. Pinerlunnermik iliuuseqartoqarsimanissaanut takussutissaqanngilaq, Mark Larsen oqarpoq.

Allatut oqaatigalugu: Meeqqerivimmi ajoraluartumik kukkusoqarpoq, maannakkutullu itsillugu sulisut ilaannik unnerluutiginnittoqarnissaanut takussutissaqanngilaq.

Misissorneqaannassasoq

Politiit suliamik misissuinertik suli naammassinngilaat. Taakku suli killisiuipput, pigaartut pisortaat oqarpoq.

Tamatuma saniatigut politiit Sullivinnik Nakkutilliisoqarfik suliffimmi avatangiisinut atatillugu immikkut ittumik malittarisassaqarnersoq misissuisussat attavigaat.

- Sullivinnik Nakkutilliisoqarfiup sulisut nakkutilliinissamut pisussaaffimmik immikkut ittumik inatsimmik unioqqutitsisimanersut paasinngippagu unnerluutiginnittoqassagunanngilaq, Mark Larsen oqarpoq.

Meeqqat angerlaqqittut

Meeqqat pingasut qaqorsaammik imersimasut napparsimmavimmit ippassaq unnukkut angerlartinneqarput, pisullu kingunerani 'ajunngitsut', pigaartut pisortaata oqaatigaa.

Meeqqerivimmi erngup aqqutaata qerinera pissutigalugu imermik kuuginnartumik imeqannginnerata kingunerisaanik dunkimik imeqartitsisoqarnerani ajutoortoqarpoq.

Qeqqata kommuniata oqarnera naapertorlugu meeqqerivimmi sulisup dunkit kukkullugit maskinamik erruinermut qaqorsaat meeqqanut imertittoorsimavaa.