Oqallitsitsineq: Siorna tassaarsuaqarnera qanoq ilikkagaqarfigisinnaavarput?
Uummannap pigisaani inuit sisamat ajunaarfigisaannik nunaqarfinnilu Illorsuarni Nuugaatsiamilu innuttaasut inuunerannik allanngortitsilluinnartumik tassaarsuaqarneranit juunip 17-iani ukioq ataasinngussaaq.
Nuummi Ilimmarfimmi Teologisk Forening aqagu sisamanngornermi unnukkut aaqqissuussaqassaaq, tassanilu palasit danskit marluk, Flemming Pless Leif G. Christensenilu, ajunaarnersuaq inuiaqatigiittut tamatta sutigut ilinniarfigisinnaaneripput, aamma inuup inuunermi taama sakkortutigisumik allannguuteqarnerani suut pisariaqartinnerai apeqqutigalugit oqallitsitsiniarput.
Flemming Plessip Leif G. Christensenillu New Yorkimi peqqarniisaarniat 2001-imi septembarip aqqarngani saassussineri ilagiit qanoq inissisimasimanersut siornatigut allaaserisimavaat, aamma New Zealandimi Christchurchimi nuna sajorujussuarmat ilagiit inuiaqatigiillu qanoq inissisimasimanersut misissorsimavaat.
Siornalu tassaarsuaqarneranut tunngatillugu nunatsinni ilagiit Karrat kangerluani juunimi 2017-imi alianartunik pisoqarneranut tunngatillugu qanoq inissisimasinnaanerinut apeqqut palasit marluusut saqqummiutissavaat.
Flemming Pless aamma Leif G. Christensen Københavnimi palaseqarfinni palasiupput Danmarkimilu Ilagiit ajunaarnersuaqarnerani upalungaarsimasuutitaanni aamma sulillutik.
Ilimmarfimmi oqallitsitsineq aqagu nal. 19.30 ingerlanneqassaaq. Oqallitsitsineq Ilisimatusarfiup YouTube-kkut kanaliatigut toqqaannartumik isiginnaarneqarsinnaassaaq.
Oqallitsitsineq KNR-radiomit immiunneqassaaq, tusarnaagassiatullu aaqqissorneqareerpat aallakaatinneqassalluni.
