Politikkikkut isumaqatigiissut nutaaq: Sinneqartoorutit atuisunut iluaqutaasariaqarput
Nunatsinni partiit amerlanerussuteqarluartut isumaqatigiissuteqartarnerat ulluinnarsiutaanngilaq, tamannali ullumi pivoq.
Inatsisartuni partiit tamangajammik, Naleraq minillugu, Namminersorlutik Oqartussat piginneqataaffigisaannut piginnittuunermut politikki nutaaq marlunngornermi isumaqatigiissutigaat.
Isumaqatigiissusiornikkut piginneqatigiiffiit Namminersorlutik Oqartussanit pigineqartut siunissami qanoq ingerlanneqassanersut ineriartortinneqassanersullu sinaakkuserneqarput.
Isumaqatigiissummi immikkoortut soqutiginarnerusut ilaanni partiit isumaqatigiissuteqartuusut, piginneqatigiiffiit soorlu Royal Greenland, Tusass aamma Royal Arctic Line inuiaqatigiinnut tunniussaqarnerunissaat piujuartitsiffiusumullu ineriartornissaat isumaqatigiissutigaat.
Naalakkersuisut siulitaasuata Múte B Egedep oqarnera naapertorlugu, ingerlatseqatigiiffiit Namminersorlutik Oqartussanit pigineqartut sinneqartooruteqarluarnissaq kisiat eqqarsaatigissanngilaat.
Tusagassiortunut katersortitsinermi ippassaq pisumi ima oqarpoq.
- Aningaasaatinippallaannginnissaat aammalu sinneqartooruteqarpallaaratik, kisiannili atuisunut akikillisaasinnaanissaat imaluunniit kiffartuussinerminnut pitsanngorsaataasinnaasunik aamma atuisarnissaannik toqqammavissiisoqarpoq uani isumaqatigiissummi.
Kisermaassilluni ingerlatsisut misissorneqassasut
Demokraatit siulittaasuata, Jens Frederik Nielsenip unammilleqatigiinnerulernissaq anguniarlugu ingerlatseqatigiiffiit kisermaassillutik ingerlatsisut arlallit kisermaassiunnaassanersut ilaatigut misissorneqassasoq oqaatigaa. Tamanna innuttaasunut ilaatigut iluaqutaassaaq.
- Soorunami uani pingaaruteqarpoq eqqaassallugu misissorluartuarnissaa taanna allassimagatsigu, nalunngilarput unammilleqatigiinneq imaluunniit kisermaassisussaatitaaneq ilaatigut atorfissaqarsinnaasariaqartoq, taamaammat misissortuarnissaa taanna taannarpiaq eqqarsaatigalugu ilanngunnikuuarput soorunami isumaqatigiissummi.
Namminersorlutik Oqartussaat piginneqataaffigisaat pillugit piginnittuunermut politikki nutaaq pillugu isumaqatigiissummi Inatsisartuni partiini Naleraq kisiartaalluni peqataanngilaq.
Múte B. Egedep oqarnera naapertorlugu isumaqatiginniarnermi isumaqatigiinniarnerup naammassilernerani Naleraq peqataajunnaartoq.
