Silarlungaatsiarnera timmisartukkut angallannermut kinguaattoortitsisoq

DMI sapaatip akunnerani matumani sisamanngornermi anorersuarnissaanik ilimasaaruteqarpoq, tamanna Nuummit Nuummullu timmisartuussinerit taamaatinneqarnerannik ilaatigut kinguneqarpoq.

Naqitsiniisaffik Newfoundlandimit Davis strædetimut ingerlaartoq pissutaavoq. Taamaalilluni naqitsiniisaffiup kangiata tungaaniippugut, tassanngalu sakkortuumik anorlissaaq.

- Nuummili aqagu unnukkut nalunaaqutaq arfineq-marluk qulingiluallu akornanni qatsussaaq, Nuummiillu ingerlaarnermini sakkukilliartussalluni, DMI-mi silasiortoq, Anette Hartvig Nielsen oqarpoq.

Naqitsiniisaffik anorsaritsitsissaaq anorersuartullu sakkortutigisumik anoraasuasassalluni. Silap taamaannissaa nalinginnaasoq, silasiortup erseqqissaatigaa. Nalinginnaanngitsorli tassaanerarpaa ukiup taamaalinerani silap unerisimannginnerujussua, oqarpoq.

Silap qanoq innissaa ilimasaarutigineqartoq ukiakkut, ukiukkut upernaakkullu takkuttaraluarpoq, silasiortullu upernaap ukioq manna sivisunera nassuiaatigaa.

Nuummiit Nuummullu angalasussat taamaatinneqartut

DMI-mik silamik ilimasaaruteqarneq pissutigalugu Nuummiit Nuummullu sisamanngornermi nalunaaquttap ullaakkut arfineq-pingasuniit unnukkut arfineq-pingasut tungaanut timmisartuussisoqarsinnaanngilaq.

Air Greenland mailikkut KNR-imut allappoq.

Nuummiit unnugu aqagulu ullaaralaakkut anorlilinnginnerani saniatigut timmisartuussinisoqarnissaa sulissutigineqarpoq. Timmisartuussineq sisamanngornermi unnukkut anorersuarunnaarpat aallartinneqaqqissaaq.

Nuummi anorersuarnissaa Nuummut tikittussanut aallartussanullu kisimi sunniuteqarani sumiiffippassuarnut sunniuteqassaaq.

- Angalaffissanik nutaanik suliaqartoqaleruttorpoq, ilaasussat taamaalillutik kingusinnerpaamik sapaatiuppat aallartinneqarsinnaanissaat naatsorsuutigineqarluni, Air Greenland allappoq.

Tallimanngornermi arfininngornermiluunniit angalasussaaguit tamanna ilinnut allannguuteqarnavianngilaq. Ilaasussat eqqorneqartut angalanissamut pilersaarummik nutaamik ullumi pingasunngornermi nalunaaqutaq sisamanngortinnagu tunineqassapput.

Sialuk aamma suli sialuk

Naqitsiniisaffik Nuummiit avannarpasinnerusumut Sisimiut tungaannut aqagumit ingerlaassasoq, DMI-p oqaatigaa.

- Naqitsiniisaffik Sisimiunut tallimanngornerup unnuaani unammillernartoqartitsilaarsinnaavoq, Maniitsoq aamma aqagu ualikkut ataatsit pingasullu akornanni anngutissangatinneqarpoq, silasiortoq, Anette Hartvig Nielsen oqarpoq.

Anori avannarpariartortilluni sakkukilliartussaaq, anorsarimmik anorersuartut sakkortutigisumik taamaallaat anoraasualissalluni, silasiortoq oqarpoq.

Silasiortup tallimanngornermi ullaakkut anorlerunnaassangatippaa.

- Aasianni aamma anorlissaaq, naqitsiniisannerali qaangiukkiartulissasoq, Anette Hartvig Nielsen oqarpoq.

Saniatigut sialussuangaatsiarnissaa aamma piareersimaffigissavat. Sapaatip akunnerani siusinnerusukkut aqagu 58 millimeterimik siallernissaa ilimasaarutigineqarpoq, allanngungaatsiarporli. Ataaserli qularnanngilaq. Siallingaatsiarnissaanut piareersimassaatit.