Silami isikkamik arsaannermi angutit sungiusaasortaarput
Kalaallit Arsaattartut Kattuffiat silami isikkamik arsaannermi angutinut sungiusaasortaarput.
KAK-p qallunaaq 46-inik ukiulik Morten Rutkjær atorfinitsippaa.
Taanna Europami isikkamik arsaannermi sungiusariaatsimut qaffasinnerpaamut allagartaqarpoq. Danmarkimilu iligiit assigiinngitsut sungiusartarnikuullugit.
AAMMA ATUARUK KAK pissartanngorniunnissat taamaatinneqarnerat pillugu: Timersornermut ilungersunartorujussuuvoq
- Sungiusaasoq misilittagaqarluartoq uatsinnut pingaaruteqarpoq, silamimi arsaannermi unammisartut pilerseqqinneqartussaapput, Island Gamesimullu aappaagu ingerlanneqartussamut peqataassallutik, KAK-imi siulittaasoq Finn Meinel oqarpoq.
Sungiusaasortaaq aggutsip 15-ianiit ulluni tallimani Nuummiissaaq, 21-aniillu ulluni arfinilinni Ilulissaniissalluni. Tassani arsaattartut piginnaasaat nalilersussagai, KAK allappoq.
Morten Rutkjærip illoqarfiit marluinnaat tikeraassavai, qaammatinilu tulliuttuni arsaattartunik Island Gamesimut aappaagu ingerlanneqartussamut ilaasussatut piukkussaminik toqqartuissalluni.
- Atorfinitsinneqarnera nuannaarutigaara, nalunngilaralu kalaallit inuusuttut arsaatillammaasut, siunissamilu nunanut allanut unammisartut nukittuumik inissinnissaat anguniassavara, Morten Rutkjær oqarpoq.