Danmarkimi naalakkersuisut siunnersuutaat: Silaannakkut saassussinermut illersorsinnaanissaq pisariaqarpoq

Sakkutuut imarsiortut timmisartuaqqanik ungasianit aqunneqarsinnaasunik dronenik, qaartartunillu igeriuttakkanik nakkartitsisinnaanissamut periarfissagissaarnerusariaqarput.

Danmarkimi naalakkersuisut illersornissaq pillugu Danmarkimi ukiunut tulliuttunut isumaqatigiissutissatut siunnersuummi taama ilaatigut oqarput. Sakkutuut allat aamma taama periarfissaqartariaqartut siunniunneqarpoq.

Kunngeqarfiup silaannakkut immakkullu saassunneqarnermi illersorneqarsinnaanissaa pisariaqarpoq. Danmarkimi naalakkersuisut taama isumaqarput, qaartartullu igeriuttakkat torpedollu atorlugit imminut illersorsinnaanissaq pillugu 6,5 milliardit koruuninik aningaasaliiniarlutik.

Akeqqat aqqartartut atorlugit assersuutigalugu Danmarkimi, Kalaallit Nunaanni Savalimmiunilu saassussissagaluarpata torpedot atorneqarsinnaasariaqartut Danmarkimi naalakkersuisut isumaqarput.

Silaannakkut saassussisoqartillugu sakkutuut aamma imminut illersorsinnaasariaqarput.

Nunat killiit illersoqatigiiffiata NATO-p illersornissamut aningaasaliissutissatut piumasaqaatai kunngeqarfiup Danmarkip taamaasilluni qulakkiissavai. Danmarkimi illersornissaqarfik tusagassiorfinnut nalunaarummi taama allappoq.

Illersornissaqarfimmi sulisut amerlanerusariaqartut

Kunngeqarfimmi illersornissaqarfimmi sulisut aamma amerlanerusariaqartut Danmarkimi naalakkersuisut isumaqarput, illersornissaqarfimmilu sulisussanik pissarsinissamut, sulisoriinnarnissaannut ilinniartinneqarnissaannullu 3,5 milliardit koruuninik immikkoortitsiniarlutik.

Illersornissaqarfimmi sulisut ukiuni kingullerni ikiliartupiloorsimapput tamannalu maanna allanngortinniarneqarluni.
Sakkutuut peqatigiiffiata HKKF-ip oqarnera naapertorlugu akissarsiat appasippallaarnerat matumani pissutaanerpaavoq.

Illersornissaq pillugu isumaqatigiissutissatut siunnersuut aningaasanik 13 milliardit koruuninik naleqarpoq, illersornissaqarfillu ataatsimut isigalugu 143 milliardit koruunit nalinginut nukittorsarneqarniarluni.

Illersornissaqarfiup aqutsisoqarfianit paasissutissat annittuukkat nittartakkap Altinget Arktisip sapaatit akunnerata siuliani saqqummiuppai.
Kalaallit Nunaanni timmisartoqarfinnik sakkutooqarfiusunik, Issittumi Sakkutooqarfimmit aqunneqartunik pilersitsinissamut aningaasaliisoqarniartoq ilaatigut allassimavoq.

Sakkutuulli imarsiortut umiarsuatoqaat imartanik alapernaarsuinermut suli ukiuni 15-ini atorneqarnissaat siunniunneqarpoq, tamannali illersornissaq pillugu immikkut ilisimasalinnit isornartorsiorneqarluni.

Kunngeqarfik tamakkerlugu illersornissamut isumaqatigiissut nutaaq Folketingimi partiit isumaqatigiinniutigissavaat, Atlantikup avannaani ilaasortat aamma isumaqatiginninniarfigineqassallutik.