Mimi Karlsenip Ivaaraq qaammatit arfineq-marluk qaangiuttut aatsaat pulaarpaa: Sila ajornikuuvoq

Innarluutillit inaat, Ivaaraq oqallisaangaatsiarsimasoq meeqqanut, inuusuttunut, ilaqutariinnut peqqissutsimullu naalakkersuisumit, Mimi Karlsenimit ippassaq pulaarneqarpoq.

Mimi Karlsenip innarluutillit inaanni siorna septembarimi alianarluinnartumik pisoqarnerata saqqummiunneqarnerata kingornanit aatsaat siullermeerluni pulaarpaa.

Arnarmi, 23-nik ukiulik, annertuumik innarluutilik napparsimmaviliaanneqariataarsimasoq tamanullu uissuumminartumik ernertaartoq ukkatarineqangaatsialerpoq.

Arnaq pisussinnaananilu oqalussinnaanngilaq.

Angut 62-inik ukiulik arnap akuersissuteqarnerminik oqaaseqarsinnaannginnera pissutigalugu Kalaallit Nunaanni Politiinit atornerluisoqarsimaneratut taaneqartumut atatillugu novembarimi tigusarineqarpoq.

Angutip inatsit tunngaviusoq naapertorlugu killisiorneqarnermini arnamik taamani 22-nik ukioqartumik atornerluisimanini nassuerutigaa.

Naalakkersuisoq: Sila ajornikuuvoq

Pisup kingunitsianngua nunatsinni ulloq unnuarlu paaqqutarinniffinni pissutsit nakerisassarsiunngitsumik misissorneqarnissaa meeqqanut, inuusuttunut, ilaqutariinnut peqqissutsimullu naalakkersuisumit, Mimi Karlsenimit aallartinneqarpoq.

Misissuinermi inatsit paaqqutarinniffinni malinneqarnersut takutinneqartussaapput.

Naalakkersuisulli, Mimi Karlsenip Qaqortoq aamma ulloq unnuarlu paaqqutarinniffik Ivaaraq nammineerluni tikeraanngilaa.

- Naalakkersuisutut Qaqortumukarnera nuannaarutigaara, naak ukiuunerani silap tamanna periarfissaatinngikkaluaraa. Taamaatiinnarneqartorpassuupput. Taamaakkaluartorli Ivaaqqamut atatillugu sulineq uninnganikuunngilaq, taanna KNR-imut oqarpoq.

Qaqortumiinnermi suna ullormut sammisassaniippat?

- Qaqortumukarnitsinni Ivaaraq kisimi sammineqanngilaq. Ivaaraq, peqqinnissaqarfik, meeqqat angerlarsimaffiat ilaapput, aqagulu kommunimik oqaloqateqassaanga.

Mimi Karlsenilli Ivaaqqami susoqarsimanerata paasinarsisinniarneranik suliaq kiisalu ajornartoornermut upalungaarsimaneq sulisunullu ikiuinissamut periarfissaqartitsineq septembarimiilli ingerlaalersut, KNR-imut erseqqissaatigaa.

Unnuarsiortut kisimiissanngitsut

Arnap 23-nik ukiullip pinngitsaalillugu atoqatigineqarneranut atatillugu Namminersorlutik Oqartussat Nakkutilliisuinit nakkutilliinermik nalunaarusiortoqarpoq.

Meeqqanut innarliisimannginnermut uppernarsaat akunnikkaartumik aaneqartarnissaa kinguaassiutillu pillugu politikki iluarsaanneqassasoq ilaatigut inerniliissutigineqarpoq.

Tamannali naammanngitsoq, niviarsiaqqamut allamut taamani Ivaaqqamiittumut anaanaasoq, Laura Taunajik Uitsatikitseq uparuaavoq. Taassuma oqarnera naapertorlugu angutit unnuarsioqqusaassanngillat nakkutilliissutinillu filmiliutinik pilersuisoqassaaq.

Meeqqanut, inuusuttunut, ilaqutariinnut peqqissutsimullu naalakkersuisup, Mimi Karlsenip pisimasumut assingusumik pisoqaqqinnginnissaanut Naalakkersuisut tungaanniit maanna suliniuteqartoqarsimasoq erseqqissaatigaa:

- Septembarimi pisup tataannarluinnartup kingunerisaanik assigiinngitsunik suliaqartoqarpoq. Siullertut meeqqanik nunatsinni paaqqutarinniffinni assigiinngitsuniittunik pitsaanerpaamik illersuiniarlunga suliamik aallartitsivunga, tassa unnuarsiorfissani unnuarsiortut marluusartussanngortippagut, taanna oqarpoq.

- Aamma meeqqap nangilersorneqarnerani sulisut marluusarnissaat piumasaqaatigaarput.

Mimi Karlsenip sinaakkutit inuusuttut takoreerlugillu Ivaaqqami meeqqat avatangiisaat toqqissisimanartut erseqqissaatigaa.