Innarluutilimmut anaanaasoq: Eqqissisinnaanngorpunga
Angut 62-inik ukiulik Qaqortumi innarluutillit inaanni Ivaaqqami najugalimmik, innarluutilimmik pinngitsaaliilluni atoqateqarsimasutut pasineqartoq Kalaallit Nunaanni Politiit pingasunngornermi tigusaraat.
Arnaq innarluutilik 23-nik ukiulik septembarip aallartinnerani ernimmat naartusimasoq sulisunit aatsaat paasineqarpoq.
AAMMA ATUARUK Maibritt Lothsen: Paniga Ivaaqqamut uteqqissanngilaq
Angutip tigusarineqarnera innarluutilimmut anaanaasumut misigissutsikkut aalassatitsivoq.
- Kamaqqaqaanga, kisianni aamma eqqissiallannartorujussuuvoq `kinamita taamaaliorpamik`eqqarsarunnaarluni eqqissiallannaqaaq, Maibritt Lothsen KNR-mut taama oqarpoq.
Arnaq oqaaseqarnanilu taamaallaat paarngussinnaammat atoqateqarnissaminut akuersissuteqarsinnaanngitsoq, politiit naatsorsuutigaat.Taamaammallu suliaq atornerluisoqarneratut politiinit misissuiffigineqarpoq.
Arnap innarluutillip erneriataarnera innarluutilimmut anaanaasumut Maibritt Lothsenimut sakkortusimavoq, sorsuutigisassammi imaaginnavipput.
- Kisianni aamma qujaniarnerujussuup tikeqqavaanga misissuinerup ingerlanerani ikiuuttorpassuarnut, Maibritt Lothsen attortisimaqaluni oqarpoq.
Angut inatsit tunngaviusoq naapertorlugu ullumi killisiorneqarpoq. Taassuma arnamik atornerluisimanini nassuerutigaa. Arnaq pinerluffigineqarnermi nalaani 22-nik ukioqarpoq.
AAMMA ATUARUK Angut 62-inik annertuumik innarluutilimmik atornerluisimasutut tigusarineqartoq
Killisiuineq matoqqasumik ingerlanneqarmat suliami matumani aqqit pineqartut isertuunneqarput.
Naalakkersuisoq: Akuerineqarsinnaanngilluinnarpoq
Angutip tigusarineqareernerata kingorna Meeqqanut, Inuusuttunut Ilaqutariinnullu Naalakkersuisup Mimi Karlsen qisuariaateqarpoq, tusagassiutinullu ima allagaqarluni:
- Pisoq alianarpoq akuerineqarsinnaanngilluinnarlunilu. Taamatut pisoqaqqinnginnissaa qulakkeerniarlugu Naalakkersuisutut erngertumik assigiinngitsunik iliuuseqarnissamik piumasaqarpunga," Meeqqanut, Inuusuttunut, Ilaqutariinnut Peqqissutsimullu Naalakkersuisoq, Mimi Karlsen oqarpoq.
Mimi Karlsen naapertorlugu meeqqanut inuusuttunullu ulloq unnuarlu angerlarsimaffinni arlalinni sukaterineq aallartereerput, taamatuttaaq innarluutillit angerlarsimaffiini.
- Meeqqanut, inuusuttunut innarluutilinnullu angerlarsimaffiit sukateriffigineqarput. Ingerlatseriaatsit misissorneqarput, ilaatigut sulisut marluujuaannarnissaat piumasaqaatigivara. Pisoq ilungersunarluinnarpoq neriorsuutigissavaralu meeqqanut, inuusuttunut innarluutilinnullu angerlarsimaffiit ukkatarineqassammata, Mimi Karlsen oqarpoq.
DNA-mik misissuineq tunngavigalugu tigusarinnittoqarpoq
Angutip meeqqallu DNA-visa imminnut naapertuunnerat angutip 62-nik ukiulllip tigusarineqarneranut tunngaviusut, politikommisæri Julie Senderovitz Bendtsen oqarpoq, taannami nunatsinni kinguaassiutitigut atornerluinernut paasiniaanernut aqutsisuuvoq.
Arnaq innarluutilik nammineerluni oqalussinnaannginnini pillugu politiinut nassuiaasinnaanngimmat, angutit arlallit pineqartumut attaveqarsimasut DNA-vi misissorneqarput.
- DNA-mik misissugassat tamarmik pissarsiareriarlugit taakku Danmarkimi Reskemisk Institutimut misissueqqissaarneqartussanngorlugit nassiunneqarput. DNA-mik misissuinerit tamarmik meeqqap anaanaasullu DNA-vanut sanilliunneqaqqaarlutik inaarutaasumik akissutersisussaavagut. Misissugassat maanna akissutissarsivagut, tassanilu tigusarineqartumut assigiiffeqartut paasineqarpoq, sinnerilu ilaatinneqarunnaarsinnaalerlutik-
Angut ulluni 22-ni eqqartuussivimmit tigummigallarneqartussanngortinneqarpoq.