Angut 62-inik annertuumik innarluutilimmik atornerluisimasutut tigusarineqartoq
Angut 62-inik ukiulik Qaqortumi innarluutillit inaanni Ivaaqqami najugalimmik, innarluutilimmik pinngitsaaliilluni atoqateqarsimasutut pasineqarluni Kalaallit Nunaanni Politiinit ippassaq tigusarineqarpoq.
Kalaallit Nunaanni Politiit tusagassiuutinut nalunaarummi allapput.
Angut inatsit tunngaviusoq naapertorlugu ullumi killisiorneqarpoq. Taassuma arnamik atornerluisimanini nassuerutigaa. Arnaq pinerluffigineqarnermi nalaani 22-nik ukioqarpoq.
Suliaq naatsumik
23-nik ukiulik, annertuumik innarluuteqartoq septembarip aappaani ernertaavoq, taassuma naartunera kimilluunniit ilisimaneqanngilaq.
Arnaq oqalussinnaanngilaq, paarnguinnarsinnaallunilu nangeqartuuvoq.
Qaqortumi Politiit Ivaaqqami kinguaassiutitigut atornerluisoqarsimanera pillugu nalunaarfigineqarsimallutik erngertumik uppernarsarpaat.
Meeqqanut, inuusuttunut, ilaqutariinnut peqqissutsimullu naalakkersuisup, Mimi Karlsenip (IA) nuna tamakkerlugu ulloq unnuarlu paaqqinniffimmi pissutsinik misissuisoqarnissaa aallartippaa. Paaqqinniffimmi inatsisit malinneqarnersut misissorneqassapput.
Tiliup aamma Inuit pisinnaatitaaffii pillugit Siunnersuisoqatigiit suliamut atatillugu isornartorsiuingaatsiarput, Inuit Pisinnaatitaaffii pillugit Siunnersuisoqatigiit unioqqutitsineq inuit pisinnaatitaaffiinik unioqqutitsinerunerarpaa.
Isumaginninnermut aqutsisoqarfik suliap saqqummerneranit ullualuit qaangiuttut Qaqortumukarluni sulisut Ivaaqqamilu aqutsisut peqatigalugit suliamik misissuivoq.
Arnaq septembarip aallartinnerani ernimmat naartusimasoq sulisunit paasineqarpoq. Arnaq oqaaseqarnanilu taamaallaat paarngussinnaammat atoqateqarnissaminut akuersissuteqarsinnaanngitsoq, politiit naatsorsuutigaat.
AAMMA ATUARUK Maibritt Lothsen: Paniga Ivaaqqamut uteqqissanngilaq
Taamaammat suliaq atornerluisoqarneratut politiinit misissuiffigineqarpoq.
Angut ulluni 22-ni tigummigallagassanngortinneqartoq
Tigusarineqartup meeqqallu akornanni DNA-mik misissuineq angutip tigusarineqarneranut pingaartumik uppernarsaataasoq, Kalaallit Nunaanni Politiit pinngitsaaliisoqarneranik misissueqqissaartartuisa aqutsisuata, politikommissærip, Julie Senderovitz Bendtsenip nassuiaatigaa.
- Suliami pasineqarsinnaasut arlallit DNA-mik misissuinernik erngertumik misissuiffigaagut. Angutit tamarmik arnamut attaveqarsimasut tamarmik pasineqarsinnaasut malillugit suliaqarpugut. Pissutsit taakkununnga nuannersimanavianngitsut ilisimalluarlugit killisiullutalu misissugassamik tigusiffigaagut, tamannali arnap oqaaseqarsinnaannginnera taamaammallu politiinut nassuiaateqarsinnaannginnera pissutigalugu pisariaqarpoq, Julie Senderovitz Bendtsen oqarpoq.
AAMMA ATUARUK Laura Taunajik Uitsatikitseq: Paniga Ivaaqqamiiginnassappat angummik unnuarsiortoqartassanngilaq
- DNA-mik misissugassat tamarmik pissarsiareriarlugit taakku Danmarkimi Reskemisk Institutimut misissueqqissaarneqartussanngorlugit nassiunneqarput. DNA-mik misissuinerit tamarmik meeqqap anaanaasullu DNA-vanut sanilliunneqaqqaarlutik inaarutaasumik akissutersisussaavagut. Misissugassat maanna akissutissarsivagut, tassanilu tigusarineqartumut assigiiffeqartut paasineqarpoq, sinnerilu ilaatinneqarunnaarsinnaalerlutik-
Angut ulluni 22-ni eqqartuussivimmit tigummigallarneqartussanngortinneqarpoq.
