SIK-p akissarsiat 92 øremik qaffanneqarnissaannut neqeroorut kamaatigigaa

SIK-p siulittaasuata ilaasortat ilinniarsimasut akunnermut akissarsiaasa agguaqatigiissillugu 92 øremik qaffanneqarnissaannut neqerooruteqarfigineqarsimalluni KNR-imut ilisimatitsissutigaa. Ilinniarsimanngitsunut neqeroorut agguaqatigiissillugu 1 koruunit 12 øreuvoq.

Tamanna Jess G Berthelsenip SIK-imi ilaasortat ilinniarsimasut ilinniarsimanngitsullu sinnerlugit Namminersorlutik Oqartussanut kommuninullu isumaqatigiinniuteqartup naammaginngeqaa.

- Maannakkut nunatta aningaasarsiornera ajunngitsutut nalilerneqartariaqarpoq. Ajunngitsumik ingerlaneq tamanna minnerunngitsumik sulisut pilersitaraat. Paasiuminaapporlu taa­va sooq sulisut taamak suusupagineqartigissanersut, siulittaasoq oqarpoq.

SIK naapertorlugu oqalutsit akissarsiatigut annerpaamik qaffaaffigineqarniarput tassalu akunnermut 1 koruunit 10 ørelu, qatserisartunullu neqeroorut appasinnerpaalluni 10 øreulluni.

AAMMA ATUARUK Akissarsiatigut pitsanngorsaaneq sulisunut aalaakkaanerulersitsissaaq

Kalaallit Nunaanni inuuniarneq nunanut avannarlernut EU-mullu sanilliullugu akisunerpaasoq, Danmarkimi naatsorsueqqissaartarfiup misissuinerata takutippaa. Tamannali akissarsiat isumaqatigiinniutigineqarneranni isiginiarneqartanngimmat, Jess G. Berthelsenip isornartorsiorpaa.

- SIK-p isumaqatigiissutaanik maannakkut atuisut akissarsiaat akiligassanut malinnaasinnaanngilluinnarput. Tamanna kommunit aamma Namminersorlutik Oqartussat ilisi­maq­­qissaaraluarpaat, taamaakkaluartoq qanoq iliuuseqarusunngillat. Ata, politikerit assasi errortorniaqinasigit oqarlusi isumaqatigiinniarnermut akulerunniarasi. Taamaatto­qan­ngilaq! Maannakkununa ilissi isumaqatigiinniarnermi killiliussasi unittoortitsisut – aki­sus­saaffimmik tigusillusi qanoq iliuuseqarniaritsi, Jess G. Berthelsen oqarpoq.

AAMMA ATUARUK Perorsaasut akissarsiaat qaffanneqartariaqartut

Sulisunut tusindilinnut pitsaanerusunik akissarsiaqartitsisoqartinnagu mittarfiliornissamut milliarderpassuit atorniarneqartut eqqumiiginarluinnarnerarpaa.

SIK-p nammineq kisitsisaatai naapertorlugit ilinniarsimasut ullumikkut agguaqatigiissillugu akunnermut 110 koruuninik aningaasarsiaqarput, ilinniarsimanngitsullu 91,67 koruuninik aningaasarsiaqartarlutik. Tamatuma saniatigut sulinngiffeqarnissami akissarsiassat soraarnerussutisiassallu ilaapput.